Առաջին նախագահը հայտարարություն արել է դեկտեմբերին, որը մնում է ուժի մեջ, այն է՝ բախումներից խուսափելու համար երկիրը պետք է գնա քաղաքական լուծումների. Դեռ կա այդ հնարավորությունը: Այս մասին այսօր՝ մարտի 1-ին, Ալեքսանդր Մյասնիկյանի արձանի մոտ NEWS.am-ի հետ զրույցում նշեց ՀԱԿ անդամ Արամ Մանուկյանը:
«Կա խորհրդարան, որը կարող է որոշում ընդունել ցանկացած: Ցանկացած որոշու, որը կարող է բերել հանգուցալուծման եւ կանգնեցնել այս գահավիժումը, այս իրար ուտելու պրոցեսը, եւ երկիրը մտնի խաղաղ փուլ: Դա անհրաժեշտ է ոչ միայն հանուն ընտրությունների կամ հանուն իշխանափոխության, այլ անհրաժեշտ է հին վերքերը բուժելու, երկիրը կանխատեսելիճանապարհ մտցնելու համար: Սա է միակ անհրաժեշտ ու հրատապ լուծումը: Ինչքան ուշացնենք, իսկ մենք արդեն ուշցրել ենք, մեր կորուստները լինելու են ավելի շատ:
Մեր լուռ լինելը դրանով է պայմանավորված. Մենք առաջարկել ենք քաղաքական լուծում: Երկիրը պետք է գնա քաղաքական լուծումների, այդ ավանդույթը պետք է պահպանվի, թե չէ ռեւանշի հնարավորությունը կա, իրար բախվելու հնարավորությունը կա, կրակելու հնարավորությունը կա: Պետք է դրանից խուսափել: Այսքան ցավ ու հարված կերած ժողովուրդը մեղք է, որ գնա այդպիսի բախումների»,-ասաց Արամ Մանուկյանը:
Նա հավաստիացրեց, որ իրենք ոչ մի կողմին չեն պաշտպանում. «մենք վեր ենք կանգնած այդ կոնֆլիկտից»:
Ճշտող հարցին, թե արդյոք իրենք համարում են, որ պետք է լինեն արտահերթ ընտրություններ, ՀԱԿ անդամն ասաց. «Կա իշխանություն, թող իրենք որոշեն, թե որն է տարբերակը. Կամ վարչապետ են փոխում, կամ արտահերթ ընտրությունների են գնում, կամ բանակցությունների են գնում: Լուծումներ կան. քաղաքակրթությունը տվել է քաղաքակիրթ լուծումներ եւ պետք է օգտվել այդ հնարավորությունից, քանի դեռ ուշ չի: Հետո դա արդեն կարող է անհնար լինել, երբ բանը բանից անցավ, երբ երկիրը դարձավ անհաշվարկելի ու անկանխատեսելի»: