Հայաստանի երկրորդ նախագահը կասկածում է, որ Ղարաբաղում պատերազմի օրերին Մոսկվա նախատեսած իր այցը ՌԴ նախագահ Վլադիմիր Պուտինի հետ հանդիպման նպատակով գործող իշխանությունները հատուկ են տապալել: Այս մասին հինգշաբթի՝ մարտի 4-ին, ռուսական լրատվամիջոցների համար մամուլի ասուլիսում ասաց Հայաստանի նախկին նախագահ Ռոբերտ Քոչարյանը, հաղորդում է «Sputnik- Արմենիան»:
«Ըստ էության, սա շատ մութ պատմություն էր՝ իմ թեստին առնչվող պատմությունը։ Ես մի օր կպատմեմ այդ մասին, բայց միայն իշխանափոխությունից հետո։ Ես չեմ ուզում վատ դրության մեջ դնել մարդկանց, որոնք ինձ հայտնել են այդ պատմության մանրամասները։ Բանն այն է, որ ես հետո հակամարմինների թեստ հանձնեցի, որի պատասխանը բացասական էր»,- պատմեց Քոչարյանը։
Սա հաշվի առնելով՝ նա հիմնավոր կասկածներ ունի, որ իրականում իրեն ուղղակի թույլ չեն տվել Ռուսաստան գնալ:
Քոչարյանը նաեւ հավելեց, որ պատերազմի ընթացքում Ռուսաստանի նախագահի հետ ուղիղ շփումներ չի ունեցել, սակայն հնարավորություն է ունեցել իրավիճակի վերաբերյալ իր նկատառումներն ու դիրքորոշումը փոխանցել Ռուսաստանի ղեկավարությանը:
Հոկտեմբերի վերջին հայտնի դարձավ, որ Քոչարյանին քննչական մարմինը վերադարձրել է անձնագիրը, քանի որ նա պիտի գնար Ռուսաստան` պատերազմի օրերին օգնության կազմակերպման հարցերը քննարկելու համար։ Սակայն այնուհետեւ հաղորդվեց, որ Քոչարյանի` Մոսկվա այցը չեղարկվել է, քանի որ նրա կորոնավիրուսի թեստի պատասխանը դրական է: