ՆԱՏՕ-ի գլխավոր քարտուղար Յենս Ստոլտենբերգը հայտարարել է Թուրքիայի «կարեւորագույն նշանակության մասին», փոխանցում է Daily Sabah-ը:
«Թուրքիայի կարեւորությունը կարելի է հասկանալ ընդամենը քարտեզին նայելով»,- հայտարարել է Ստոլտենբերգը Կալիֆորնիայի Սթենֆորդի համալսարանում անցկացված առցանց միջոցառման ժամանակ:
Հարցին` արդյո՞ք Թուրքիային պետք է հեռացնել ՆԱՏՕ-ից Թուրքիայի նախագահի` իր ռուս գործընկերոջ հետ հարաբերությունների ֆոնին, Ստոլտենբերգը նշել է, որ Թուրքիան «մեծ նշանակություն ունի»: ՆԱՏՕ-ի ղեկավարը նշել է դրա աշխարհագրական հարեւանությունն Իրաքի եւ Սիրիայի հետ եւ ահաբեկչական խմբավորումների դեմ պայքարում գրանցված առաջընթացը:
Իհարկե, քաղաքականությունն անբարոյական եւ կեղտոտ բան է, բայց ամեն ինչ սահմաններ ունի: Դեռ կես տարի էլ չի անցել Ադրբեջանի եւ Թուրքիայի լկտի ագրեսիայից Արցախի եւ Հայաստանի դեմ: ՆԱՏՕ-ի անդամ երկիրը, օգտագործելով ՆԱՏՕ-ի զենքերը, ագրեսիայի լկտի ակտ է կատարել: Ընդ որում, Թուրքիան բացահայտորեն օգտվել է Մերձավոր Արեւելքից ահաբեկիչների «ծառայություններից»: Այս փաստը խոստովանել է ոչ միայն ՆԱՏՕ-ում այդքան չսիրված Ռուսաստանը, այլ նաեւ ԱՄՆ-ն, Ֆրանսիան եւ մի շարք այլ արեւմտյան տերություններ: Անտեսելով Թուրքիայի կողմից ահաբեկչական խմբավորումների զինյալների անմիջական ներգրավման վերաբերյալ բազմաթիվ փաստեր` ՆԱՏՕ-ի գլխավոր քարտուղարը հայտարարում է Թուրքիայի դերի մասին ահաբեկչության դեմ պայքարում: Որպես հաջորդ քայլ` մենք առաջարկում ենք Յենս Ստոլտենբերգին Էրդողանին Խաղաղության Նոբելյան մրցանակի առաջադրել: Բարեբախտաբար, օրինակի համար հեռու գնալ պետք չէ. հայերեն լեզվով ցուցանակը տրորող Մեհրիբան Ալիեւային հաջողվել է ՅՈՒՆԵՍԿՕ-ի «բարի կամքի դեսպան» դառնալ:
