Անկարայի Ճարտարապետների պալատը կոչ է անում կասեցնել մայրաքաղաքում շինարարությունը, որը կատարվում է հայկական եւ կաթոլիկ գերեզմանների տեղում, հայտնում է Bianet-ը:
Պալատից նշել են, որ Ուլուս շրջանում İller Bank պետական բանկի կառուցումը անօրինական է՝ հավելելով, որ բանվորները հայտնաբերել են մարդկային մասունքներ, հավանաբար փոքրամասնությունների խմբին պատկանող գերեզմանոցից:
Պալատի նախագահ Թեզաքան Քարաքուշ Քանդանի խոսքով՝ շինարարության ժամանակ հայտնաբերված մարդկային ոսկորները անատոլիական քաղաքակրթությունների քաղաքային թանգարանի փորձագետները տարել են փորձաքննության ենթարկելու: «Չնայած այս տեղեկությանը, շարունակվող շինարարությունը ոչ հարգալից վերաբերմունք է Անատոլիայի բազմամշակութայնությանը,- ասել է Քանդանը: - Անմարդկային է բետոն լցնել նրանց վրա, ովքեր ապրել են Անատոլիայում՝ անկախ նրանց կրոնից, լեզվից կամ ռասայից»:
Նրա խոսքով՝ շինարարությանը կանաչ լույս տված իշխանությունները հանցագործություն են գործել՝ խախտելով մշակութային եւ բնական արժեքների պահպանման մասին № 2863 օրենքը, եւ պալատը մտադիր է դիմել դատարան:
