Նոր մեղադրանքի կամ վերաորակավորման համար հիմքեր չկան: Այս մասին դատական նիստից հետո լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի փաստաբան Արամ Օրբելյանը:
Հիշեցնենք, որ այսօր դատարանը դադարեցրեց քրեական հետապնդումը 300.1 հոդվածով չորս մեղադրյալների նկատմամբ: Ավելի վաղ Սահմանադրական դատարանը հոդվածը Սահմանադրությանը հակասող էր ճանաչել: ՀԱՊԿ նախկին գլխավոր քարտուղար Յուրի Խաչատուրովի եւ պաշտպանության նախկին նախարար Սեյրան Օհանյանի նկատմամբ քրեական հետապնդումն ընդհանրապես դադարեցվել է: Ռոբերտ Քոչարյանի եւ նախկին փոխվարչապետ Արմեն Գեւորգյանի նատմամբ այն կշարունակվի ենթադրյալ կաշառքի մասով: Բոլոր չորս մեղադրյալները գործի՝ 300.1 հոդվածին վերաբերող մասով արդարացվել են, հետապնդումը դադարեցվել է հանցագործության փաստի բացակայության հիմքով:
Օրբելյանն ընդգծեց, որ քրեական հետապնդումն ի սկզբանե անօրինական էր: Արամ Օրբելյանը լրագրողներից հետաքրքրվեց, թե որքան է դա արժեցել պետության եւ հարկատուների համար:
«Ցանկացած գնով դատապարտելու ձգտումն ինքնին հանցագործություն է»,-նկատեց փաստաբանը: Նա նշեց, որ 309-րդ հոդվածը, որով դատախազությունը փորձում է վերաորակավորել մեղադրանքը, անցել է վաղեմության ժամկետը:
Ինչ վերաբերում է նախկին նախագահի եւ մյուսների վերականգնման համար հետագա գործողություններին, փաստաբանը նշեց, որ հարցը դեռ բաց է:
Մարդկանց մահվան եւ մարտի 1-ի հիմնական գործի մասով փաստաբանը նշեց մանրամասն հետաքննության անհրաժեշտությունը՝ արդյոք եղել են սպանություններ կամ անզգուշությունը, եղել է արդյոք հրաման: «Ի վերջո մի բան է իշխանության քաղաքական պատասխանատվությունը, այլ բան՝ քրեական պատասխանատվությունը: Ներկայիս իշխանությունը եւս պատասխանատու է պատերազմում 5 հազար տղաների մահվան եւ կորոնավիրուսից ավելի քան 4 հազար մահերի համար»,-հիշեցրեց Արամ Օրբելյանը:
