ԱՄՆ նախագահ Ջո Բայդենի կողմից ցեղասպանություն բառի գործածումը դեպքում կարելի է համարել, որ Ամերիկայի Միացյալ Նահանգները ամբողջությամբ ճանաչել և դատապարտել է Հայոց ցեղասպանությունը։ Այս մասին այսօր՝ ապրիլի 24-ին՝ Հայոց ցեղասպանության 106-րդ տարելիցին, «Ծիծեռնակաբերդում» լրագրողների հետ զրույցում նշեց ԱԺ «Լուսավոր Հայաստան» խմբակցության ղեկավար Էդմոն Մարուքյանը։
«Ես շատ հավանական եմ համարում, որ նախագահ Բայդենը ցեղասպանություն բառը կօգտագործի։ Ավելի շատ բարոյական մակարդակում է Միացյալ Նահանգների նախագահն այդ քայլն անելու։ Մեկ տարի առաջ Ամերիակայի Միացյալ Նահանգների Ներկայացուցիչների պալատը և Սենատը ճանաչեցին և դատապարտեցին ցեղասպանությունը։ Մեր դեսպանատներն, ինչպես աշխատել են այնպես էլ աշխատում էին ցեղասպանության ճանաչման ուղղությամբ։ Այդ պրոցեսը երբևէ չի դադարել, բայց դա միայն Հայաստանի կառավարության պայքարը չէ, այլ նաև սփյուռքի կազմակերպությունները մեծ դերակատարություն ունեն այստեղ։ Սա համազգային խնդիր է»,- ասաց նա։
Էդմոն Մարուքյանի կարծիքով՝ պատմության ընթացքում ցեղասպանություն եղել է այն դեպքերում, եթե տվյալ ազգը պետություն չի ունեցել կամ ունեցել է անարդյունավետ պետություն։
«Պետք է հզոր պետություն կառուցենք, ինչն այս ընթացքում չենք արել մեր բազմաթիվ թերությունների պատճառով, որ նախկինում տեղի ունեցածի համար պատասխանատուները պատժվեն, մեր իրավունքները վերականգնվեն, և մենք կարողանանք կանխել ապագայում մեր նկատմամբ կազմակերպված ցանկացած ոճրագործություն։ Նախորդ տարվա պատերազմն ինձ համար ցեղասպանության շարունակությունն էր, որովհետև նույն խաղացողների կողմից կազմակերպված բան էր, ինչ 106 տարի առաջ։ Այն ժամանակ չենք ունեցել պետականություն, հիմա ունենք, եթե ընդհանրապես չունենայինք միգուցե այլ արհավիրք ունենայինք, բայց արդյունավետ պետություն էլ չունեինք, որ հաղթեինք։ Պետք է կառուցել հզոր և արդյունավետ պետություն, որտեղ ամեն ինչ արվում է հանուն մարդու, և որտեղ մարդը ոչ թե միջոց է, այլ նպատակ»,- ավելացրեց Էդմոն Մարուքյանը։
