Նյու Յորքի պատվաստված բնակիչներին թույլ կտան դիմակ չկրել նույնիսկ փակ տարածություններում. Նյու Յորք է վերադառնում մարաթոնը, իսկ Radio City Music Hall-ը կրկին բաց կլինի պատվաստված հանդիսատեսների համար, AP-ի հաղորդմամբ՝ հայտարարել է նահանգապետ Էնդրյու Կուոմոն:
«Եկե՛ք վերադառնանք բնականոն կյանքին,- ասել է Կուոմոն:-Եթե պատվաստված եք, ուրեմն ապահով եք: Ո՛չ մի դիմակ: Ո՛չ մի սոցիալական հեռավորություն»:
Չպատվաստված եւ թույլ իմունիտետ ունեցող մարդիկ պետք է շարունակեն դիմակ կրել եւ պահպանել սոցիալական հեռավորությունը, ինչը մայիսի 19-ից պարտադիր չի լինի պատվաստանյութի երկու չափաբաժին ստացածների համար:
Միեւնույն ժամանակ, դիմակ կրելը բոլորի համար պարտադիր է որոշակի պայմաններում, օրինակ՝ դպրոցներում եւ ծերանոցներում:
Վերջին շաբաթներին ամբողջ նահանգում վարակի նոր դեպքերի թիվը կտրուկ կրճատվել է:
Նահանգապետը հայտնել է, որ Նյու Յորքի մարաթոնը տեղի կունենա նոյեմբերի 7-ին:
Radio City Music Hall-ը կրկին բաց կլինի հունիսին, սակայն միայն պատվաստված մարդկանց համար:
Ավելի վաղ նահանգապետը հայտարարել էր, որ չորեքշաբթի ձեռնարկությունների համար սահմանափակումների մեծամասնությունը կչեղարկվի՝ ներառյալ կանոնները, որոնք նախկինում սահմանափակում էին զբաղվածությունը:
