Իսրայելը Միացյալ Նահանգներին տեղեկատվություն է տրամադրել Գազայի հատվածում շենքի ռմբակոծման մասին, որտեղ տեղակայված էին Associated Press-ը եւ այլ լրատվամիջոցներ: Այս մասին հայտարարել է ԱՄՆ պետքարտուղար Էնթոնի Բլինքենը, փոխանցում է AP-ն:
Իսրայելը պնդում էր, որ շենքում տեղակայված էր «ՀԱՄԱՍ»-ի ռազմական հետախուզության գրասենյակը: Շենքը քանդվել էր հանգստյան օրերին տեղի ունեցած ավիահարվածի արդյունքում: Սակայն Իսրայելը հրապարակավ չի ներկայացրել որեւէ ապացույց, որը կհաստատեր այս: Վարչապետ Բենյամին Նեթանյահուն հայտարարել է, որ Իսրայելը պատրաստ է հետախուզության միջոցով ապացույցներ ներկայացնել շենքում «ՀԱՄԱՍ»-ի ներկայության մասին:
Բլինքենը հայտարարել է, որ «մենք լրացուցիչ տեղեկություններ ենք ստացել հետախուզական ուղիներով»: Նա հրաժարվել է բնութագրել նյութը՝ ասելով, որ «չի կարող դա մեկնաբանել»:
Մամուլի ազատության խմբերը դատապարտել են հարձակումը, որի հետեւանքով քանդվել էր շենքը եւ նոր գլուխ էր բացվել իսրայելական ռազմական եւ միջազգային լրատվամիջոցների արդեն լարված հարաբերություններում:
