Իրանի միջուկային ծրագրի վերաբերյալ վերջնական համաձայնությունը հասանելիության սահմաններում է: Պայմանավորվածություն է ձեռք բերվել վերացնել Իրանի դեմ հիմնական պատժամիջոցները՝ նավթի, նավթաքիմիայի, նավափոխադրումների, ապահովագրության եւ բանկերի ոլորտներում: Այս մասին հայտարարել է Իրանի նախագահ Հասան Ռոհանին՝ խոսելով Վիեննայում միջուկային գործարքի շուրջ բանակցություններում առաջընթացի մասին:
«Մենք մեծ քայլ արեցինք եւ սկզբունքային համաձայնություն ձեռք բերվեց»,- ասել է նա նավթաքիմիական նախագծերի բացման արարողության ժամանակ, հաղորդում է Mehr-ը:
Նրա խոսքով՝ մնացել են որոշ հարցեր, որոնք դեռեւս քննարկվում են՝ վերջնական համաձայնության հասնելու համար:
«Պատժամիջոցները չկարողացան արգելափակել մեր զարգացումը: Անցյալ տարի մենք կարողացանք գործարկել 17 նավթաքիմիական նախագիծ, չնայած կորոնավիրուսին եւ պատժամիջոցների ճնշմանը, կարողացանք ավարտել այս կարեւոր նախագծերը»: Նա հավելել է, որ այսօր համաշխարհային տերություններն ընդունում են պատժամիջոցների քաղաքականության ձախողումը՝ լավատեսություն հայտնելով դրանց վերացման վերաբերյալ: Ռոհանին ասել է, որ կա սկզբունքային պայմանավորվածություն, եւ մանրամասների շուրջ բանակցությունները շարունակվում են:
