Չինաստանի կառավարությունը առաջիկա երեք տարիների ընթացքում եւս 3 միլիարդ ԱՄՆ դոլարի օժանդակություն կտրամադրի զարգացող երկրներին` համավարակի դեմ պայքարելու եւ տնտեսական աճը վերականգնելու համար: Այս մասին ուրբաթ օրը Առողջապահության համաշխարհային առցանց գագաթաժողովում հայտարարել է Չինաստանի նախագահ Սի Ցզինպինը, հաղորդում է ՏԱՍՍ-ը:
«Չինաստանը առաջիկա երեք տարիների ընթացքում եւս 3 միլիարդ դոլար կհատկացնի զարգացող երկրներին՝ որպես համավարակի դեմ պայքարի եւ տնտեսական աճը վերականգնելու համար միջազգային օգնություն»,- ասել է պետության ղեկավարը:
Նրա խոսքով՝ Չինաստանը մինչ այժմ COVID-19-ի դեմ 300 միլիոն չափաբաժին պատվաստանյութեր է մատակարարել տարբեր երկրներ եւ մտադիր է արտասահմանյան գործընկերներին ավելի շատ մատակարարել դրանցից: Կառավարությունը խթանում է նաեւ պատվաստանյութերի արտադրության տեխնոլոգիաների փոխանցումը զարգացող երկրներին:
«Չինաստանն արդեն աշխարհի երկրներին մատակարարել է 300 միլիոն չափաբաժին պատվաստանյութեր եւ իր հնարավորությունների սահմաններում էլ ավելի շատ նման դեղամիջոցներ կտրամադրի: Չինաստանը աջակցություն է ցուցաբերում պատվաստանյութերի իր ընկերություններին` տեխնոլոգիան այլ զարգացող երկրներին փոխանցելու եւ նրանց հետ համատեղ արտադրություն սկսելու համար»,- ասել է նա։