Եվրամիությունը մտադիր է զարգացնել Աֆրիկյան մայրցամաքում կորոնավիրուսի դեմ պատվաստանյութերի արտադրությունը: Ինչպես ուրբաթ օրը Առողջապահության համաշխարհային գագաթաժողովում հայտարարել է Եվրահանձնաժողովի ղեկավար Ուրսուլա Ֆոն դեր Լեյենը, ներդրումները կկազմեն 1 միլիարդ եվրո, հաղորդում է ՏԱՍՍ-ը:
«Աֆրիկյան երկրները այժմ ստիպված են պատվաստանյութեր ներկրել, մենք մտադիր ենք տարբեր երկրներում զարգացնել ազգային արտադրական կենտրոններ, որտեղ կաշխատեն եվրոպացի մասնագետներ: Սա ենթադրում է 1 միլիարդ եվրոյի ներդրում»,- ասել է Ֆոն դեր Լեյենը:
Նա նաեւ նշել է, որ գագաթաժողովում կանդրադառնան լիցենզավորված արտադրության հարցերին, որոնց համար, ըստ նրա, արդեն կան գործիքներ եւ իրավական հիմքեր, ինչպես նաեւ մտավոր սեփականության իրավունքի փոխանցում:
Ավելի վաղ ԵՀ ղեկավարը հայտարարել էր, որ մտադիր են մինչեւ 2021 թվականի ավարտը առնվազն 100 միլիոն չափաբաժին փոխանցել ցածր եւ միջին եկամուտ ունեցող երկրներին: Ֆոն դեր Լեյենը նշել է նաեւ, որ «ԵՄ արդյունաբերական գործընկերները պարտավորվել են ցածր եկամուտ ունեցող երկրներին անվճար կամ իջեցված գնով 1,3 միլիարդ չափաբաժին փոխանցել»: Նույն ծավալը նախատեսվում է 2022թ.։ Եվրահանձնաժողովի ղեկավարը պարզաբանել է, որ պատվաստանյութերի բաշխումը կիրականացվի COVAX մեխանիզմի միջոցով:
Գագաթաժողովին ելույթ են ունեցել նաեւ ՄԱԿ գլխավոր քարտուղար Անտոնիո Գուտերեշը, Արգենտինայի նախագահ Ալբերտո Ֆերնանդեսը, Կանադայի վարչապետ Ջասթին Թրյուդոն, ՉԺՀ նախագահ Սի Ցզինպինը:
