Ամերիկյան Հանթինգթոն Բիչ քաղաքի (Կալիֆորնիա նահանգ) ոստիկանությունը 149 մարդու է բերման ենթարկել կորոնավիրուսային համավարակի կապակցությամբ սահմանված սահմանափակումների խախտման համար: Այս մասին հայտնում է CBS հեռուստաընկերությունը՝ վկայակոչելով տեղական ոստիկանությունը, փոխանցում է ՏԱՍՍ-ը:
Իրավապահ մարմինների տվյալներով՝ խոսքը խնջույքի մասին է, որը կազմակերպվել էր Հանթինգթոն Բիչում՝ TikTok սոցիալական ցանցի միջոցով: Ընդհանուր առմամբ, մոտ 2.5 հազար մարդ էր արձագանքել սոցցանցի` Ադրիան անունով օգտատիրոջ ծննդյան օրն անցյալ ուրբաթ նշելու կոչին: Ոստիկանությունը միջոցառումն անօրինական է հայտարարել եւ բազմիցս փորձել է համոզել հավաքվածներին ցրվել` կորոնավիրուսով վարակման ռիսկը նվազագույնի հասցնելու համար:
Ի վերջո ոստիկանությունը ստիպված էր բերման ենթարկել 121 մեծահասակի եւ 28 դեռահասի: Նրանց մեղադրանք է առաջադրվել ոստիկանությանն անհնազանդության, վանդալիզմի եւ հրավառության արգելքի եւ պարետային ժամի խախտման մեջ:
Ըստ Ջոնս Հոփքինսի համալսարանի` համավարակի սկզբից ի վեր ԱՄՆ-ում հայտնաբերվել է կորոնավիրուսով վարակման ավելի քան 33.11 միլիոն դեպք, մահացել է 589 891 մարդ: Երկու ցուցանիշներով էլ երկու երկրներն առաջին տեղում են աշխարհում: ԱՄՆ-ում 285.026 միլիոն պատվաստում է արվել:
