ՄԱԿ Վճռաբեկ տրիբունալը անփոփոխ է թողել բոսնիացի սերբերի նախկին գեներալ Ռատկո Մլադիչի դատավճիռը, որը դատապարտվել էր 1992-1995 թվականներին Բոսնիայում տեղի ունեցած պատերազմի ընթացքում ցեղասպանության եւ այլ հանցագործությունների համար: Սա նշանակում է, որ 79-ամյա նախկին գեներալը, որը պատերազմի ողջ ընթացքում ահաբեկել է Բոսնիան, իր կյանքի մնացած մասը անցկացնելու է բանտում, հայտնել է AP-ը:
Նախագահող դատավոր Պրիսկա Մատիմբա Նյամբեն հայտարարել է, որ դատարանը «ամբողջությամբ» մերժել է Մլադիչի բողոքարկումը եւ ուժի մեջ թողել ցմահ բանտարկությունը:
Նա նաեւ մերժել է դատախազության բողոքարկումը Մլադիչի արդարացման համար մեկ այլ` պատերազմի սկզբում էթնիկ զտումների հետ կապված ցեղասպանության մեղադրանքով:
Մլադիչը, Բոսնիայի սերբերի նախկին նախագահ Ռադովան Կարաջիչի հետ միասին, ցմահ ազատազրկման է դատապարտված բոսնիական պատերազմում էթնիկ արյունահեղություն կազմակերպելու համար, որի արդյունքում զոհվել է ավելի քան 100,000 մարդ, իսկ միլիոնավոր մարդիկ մնացել են անօթեւան:
«Բոսնիայի դահիճ» մականունը կրող Մլադիչը ղեկավարում էր վայրագությունների համար պատասխանատու զորքերը՝ սկսած էթնիկական զտումների արշավներից մինչեւ Սարաեւոյի պաշարում եւ 1995 թվականին Սրեբրենիցայի կոտորած: