iPhone 13 սմարթֆոնները կթողարկվեն սեպտեմբերին, բայց տեղեկատվական դաշտում արդեն տեղեկություններ կան iPhone 14-ի մասին, որոնք Apple ընկերությունը կարտադրի 2022թ.։ Ինչպես գրում է MacRumors պորտալը, iPhone 14-ները կունենան կորպուսի նոր նյութ՝ տիտանի համաձուլվածք։

Այն մասին, որ Apple iPhone 14 սարքերը (համենայնդեպս՝ ավագ մոդելները) կունենան տիտանի համաձուլվածքով կորպուս, մատնանշում է ամերիկյան JP Morgan Chase ֆինանսական հոլդինգի ներդրողների հաշվետվությունը։ Տվյալներից հետեւում է, որ տիտանե կորպուսները կդառնան ապագա սմարթֆոնների դիզայնի ամենանշանավոր փոփոխությունը։

Հայտնի է, որ տիտանե համաձուլվածքով կորպուսների բացառիկ մատակարարը iPhone 14-ների համար դառնալու է Foxconn ընկերությունը։ Եթե հաշվետվության տվյալները հաստատվեն, ապա iPhone 14-ները կդառնան Apple առաջին սմարթֆոնները, որոնց կորպուսը կլինի տիտանից։ Ներկայում «Էփլը» տիտանե համաձուլվածքն օգտագործում է բացառապես որոշ Watch Series 6 սմարթ ժամացույցներում, ինչպես նաեւ Apple Card-ում։

Ակտուալ iPhone-ների  կորպուսները պատրաստվում են չժանգոտվող պողպատից եւ ալյումինիումից։ Տիտանե համաձուլվածքը, ինչպես նշում են փորձագետները, ավելի ամուր է, ինչը սմարթֆոնները կդարձնի ավելի կայուն քերծվածքների հանդեպ։ Բացի այդ, դեւայսները կլինեն ավելի կայուն ճկվելու դեպքում, ինչը հաճախ դառնում է սմարթֆոնների շարքից դուրս գալու պատճառ։