Ղրիմի պլատֆորմի ֆորումը, որը նախաձեռնվել էր Կիեւի իշխանությունների կողմից, ԵՄ-ի եւ ՆԱՏՕ-ի անդամների միջեւ կեղծ հասկացված համերաշխության արդյունք դարձավ եւ ոչ մի հեռանկար չունի: Այս մասին հայտարարել է Ռուսաստանի արտգործնախարար Սերգեյ Լավրովը Հունգարիայի արտգործնախարար Պետեր Սիյարտոյի հետ բանակցություններից հետո կայացած մամուլի ասուլիսին, փոխանցում է ՏԱՍՍ-ը:
«Ես ուզում եմ ասել, որ մենք գիտենք այն մեթոդների մասին, որոնք օգտագործվում են դաշնակիցներին ստիպելու համար միանալ նման անիմաստ ակցիաների, ուստի մեզ համար զարմանալի չէ, որ ԵՄ անդամների, ՆԱՏՕ-ի անդամների նման կեղծ հասկացված համերաշխությունը հիմք հանդիսացավ այս բացարձակ դատարկ, ոչ մի հեռանկար չունեցող քարոզչական ձեռնարկի համար»,- ասել է նախարարը:
Պատասխանելով Ղրիմի թեմայով Հունգարիայի ղեկավարության հայտարարությունների վերաբերյալ հարցին՝ ռուս նախարարը շեշտեց, որ Մոսկվան Բուդապեշտի հետ հարաբերություններ է կառուցում «իրական քաղաքականության հիման վրա», եւ կողմերը «հենց դա էին անում» բանակցություններում:
«Իհարկե, [Ղրիմի պլատֆորմը] արհեստականորեն ստեղծված ռուսաֆոբ ակցիա է»,- շարունակել է Լավրովը:- Եվ նրանք կփորձեն արհեստականորեն պահպանել այդ տրամադրությունները, որպեսզի խաղան ժամանակակից Ուկրաինայում ծայրահեղ արմատական նեոնացիստական դրսեւորումների խաղը: Կիեւի իշխանությունները խրախուսում են այդ դրսեւորումները, արեւմտյան աշխարհի առաջնորդները եւս խրախուսում են դրանք»:
«Ղրիմի պլատֆորմի» ստեղծման մասին 2020 թվականի սեպտեմբերին հայտարարել էր Ուկրաինայի նախագահ Վլադիմիր Զելենսկին: Կիեւը որպես ֆորումի նպատակ տեսնում է Ղրիմն Ուկրաինային վերադարձնելուն ուղղված «միջազգային ջանքերի համակարգումը»: Ինչպես հայտարարել էին կազմակերպիչները, այդ ձեւաչափով առաջին հանդիպմանը մասնակցում են 40-ից փոքր-ինչ ավելի երկրների եւ միջազգային կազմակերպությունների ներկայացուցիչներ:
