Որոշ երկրներում կորոնավիրուսի դեմ պատվաստումների դանդաղող գործընթացը եւ COVID-19-ի դեմ պատվաստանյութերի անհավասար հասանելիությունը կարող են հսկայական կորուստներ պատճառել համաշխարհային տնտեսությանը: Նման եզրակացության են եկել Economist Intelligence Unit (EIU) հետազոտական ինստիտուտի փորձագետները, հայտնել է DW-ն:
Փորձագետները հաշվարկել են, որ վերը նշված պատճառները համաշխարհային մասշտաբով 2022-2025 թվականների ընթացքում կհանգեցնեն 2.3 տրլն դոլարի արտադրության կորստի: Առաջին հերթին, այս միտումը վերաբերում է զարգացող երկրներին՝ նախ՝ Ասիա-Խաղաղօվկիանոսյան տարածաշրջանին, որտեղ երկրների բնակչությունների զգալի մասը դեռ չի հասցրել ստանալ պատվաստանյութի նույնիսկ առաջին չափաբաժինը:
EIU-ի տվյալներով՝ համաշխարհային տնտեսության գնահատված կորուստների երկու երրորդը բաժին է ընկնելու զարգացող երկրներին, ինչի արդյունքում ավելի զարգացած արդյունաբերությամբ երկրների հետ նրանց մերձեցման գործընթացը կդանդաղի: Չի բացառվում, որ այս շրջաններում նման իրավիճակը հասարակական դժգոհության եւ սոցիալական խռովությունների աճի կհանգեցնի, զգուշացնում են փորձագետները:
Հետազոտության համաձայն՝ 2021 թվականի օգոստոսի դրությամբ ավելի մեծ եկամուտ ունեցող բնակչությամբ երկրներում պատվաստանյութի առնվազն առաջին չափաբաժինը ստացած բնակիչների մասնաբաժինը հասնում է 60 տոկոսի: Պակաս հարուստ երկրներում այս ցուցանիշը կազմում է ընդամենը մեկ տոկոս:
