Չորեքշաբթի օրը Վանկուվերի եւ Կանադայի այլ քաղաքների փողոցներում բողոքի ցույցեր են անցկացվել պատվաստումների դեմ, հայտնում է «ՌԻԱ Նովոստի»-ն՝ վկայակոչելով CBC հեռուստաալիքը:
Դրա տվյալներով՝ ամբոխները, որոնք կոչ էին անում «մերժել պարտադիր պատվաստման բռնակալությունը», հավաքվել էին Վանկուվերի, Վիկտորիայի, Կամլուպսի եւ այլ քաղաքների հիվանդանոցների մոտ: Ընդ որում, նշում է CBC-ն, երկրում պատվաստումը պարտադիր չէ բնակչության բոլոր խմբերի համար:
Ամենախոշոր բողոքի ակցիան տեղի է ունեցել Վանկուվերում, որտեղ, ոստիկանության հաշվարկներով, ճանապարհը փակել էր հինգ հազար մարդ:
Հեռուստաընկերությունը հայտնում է նաեւ, որ բողոքի ակցիայի ժամանակ բուժաշխատողի նկատմամբ ֆիզիկական բռնության դեպքի մասին հաղորդում է ստացվել: Բրիտանական Կոլումբիայի նահանգի վարչապետ Ջոն Հորգանը, որտեղ եւս բողոքի ցույցեր են տեղի ունեցել, դատապարտել է ցուցարարների կողմից ագրեսիայի դրսեւորումները:
Ավելի վաղ հաղորդվել էր, որ Կանադան կպարտավորեցնի դաշնային քաղաքացիական ծառայողներին, ինքնաթիռների, գնացքների եւ զբոսաշրջային նավերի ուղեւորներին պատվաստվել կորոնավիրուսի դեմ: Առողջապահության նախարարության վերջին տվյալների համաձայն՝ բնակչության ավելի քան 65 տոկոսը լիովին պատվաստված է:
