ԱՄՆ գյուղատնտեսության նախարարությունը երեքշաբթի խոստացել է 700 միլիոն դոլար վճարել գյուղատնտեսության ոլորտի աշխատողներին, մսի փաթեթավորողներին եւ համավարակից տուժած, այսպես կոչված, առաջին գծի տեղի մթերային խանութների աշխատողներին, փոխանցում է ՏԱՍՍ-ը:
«Այս ծրագիրն օգնություն կտրամադրի գյուղացիական աշխատողներին եւ կփոխհատուցի COVID-19 համավարակի հետեւանքով առաջացած ծախսերը»,- մեջբերում է Hill թերթը նախարարության հայտարարությունը:
Ըստ գերատեսչության՝ օգնությունը պետք է ծածկի ողջամիտ թվով աշխատողների եւ նրանց ընտանիքների ծախսերը: Դրանք կարանտինին հետեւելու եւ կորոնավիրուսի ախտորոշման թեստերի, անհատական պաշտպանիչ սարքավորումների եւ հիվանդների խնամքի ծախսերն են:
«Այս ծրագիրը ներկայիս վարչակազմի ջանքերի մի մասն է, որն ուղղված է համավարակի ազդեցության մեղմմանը նրանց համար, ովքեր ամենից շատ [օգնության] կարիք ունեն»,- ասել է ԱՄՆ գյուղատնտեսության նախարար Թոմ Վիլսակը:
Հատկացված միջոցները որպես դրամաշնորհ կբաշխվեն պետական կառավարման մարմինների, տեղական ինքնակառավարման մարմինների ղեկավարների եւ ոչ առեւտրային կազմակերպությունների միջեւ: Գումարը կտրամադրվի 5 մլն դոլարից մինչեւ 50 մլն դոլարի չափով: Եվս 20 մլն դոլար կհատկացվի խանութների աշխատողներին: Այս ծրագրով ֆերմերներն ու մսամթերք փաթեթավորողները 600-ական դոլար կստանան:
