ՀՀ երկրորդ նախագահ Ռոբերտ Քոչարյանի եւ նախկին փոխվարչապետ Արմեն Գեւորգյանի գործով դատավարությունը շարունակում է չհիմնավորված որոշումներ կայացնելը: Այս մասին դատական նիստից հետո լրագրողների հետ զրույցում ասաց Արմեն Գեւորգյանի պաշտպան Լուսինե Սահակյանը:
Ինչպես հաղորդվել էր ավելի վաղ, փաստաբանը միջնորդություն է ներկայացրել` Գեւորգյանի անձեռնմխելիությունը ճանաչելու եւ տեղաշարժի սահմանափակումները վերացնելու համար: Միջնորդությունը կապված է նրա հետ, որ Գեւորգյանը, լինելով ՀՀ ԱԺ պատվիրակության անդամ, դատարանի որոշման պատճառով չի կարողացել մասնակցել ԵԽԽՎ նիստին: Լուսինե Սահակյանը դատարանին հիշեցրեց, որ պետության անմիջական պարտականությունն է ապահովել ԵԽԽՎ անդամի անձեռնմխելիությունն ու տեղաշարժի ազատությունը: Ի պատասխան` դատավոր Աննա Դանիբեկյանը համարեց, որ միջնորդության քննարկումը պետք է հետաձգվի մինչեւ Սահմանադրական դատարանի որոշումը: Ճիշտ է, ՀՀ ԱԺ պատգամավորները եւս դիմել են Սահմանադրական դատարան, բայց` քրեական գործերի շրջանակներում մի շարք ընդդիմադիր պատգամավորների անձեռնմխելիության հարցով: Իսկ դա, վստահ է փաստաբանը, տարբեր «անձեռնմխելիություններ» են:
«Դատարանն իրավունք չուներ չբավարարել միջնորդությունը, քանի որ դա պարտավորություն էր»,- լրագրողների հետ զրույցում ասաց Սահակյանը: Ինչ վերաբերում է ազատ տեղաշարժի իրավունքի սահմանափակման վերացմանը, ապա, շարունակեց փաստաբանը, այստեղ էլ ոչ մի երկիր սահմանափակելու իրավունք չունի: Սակայն դատարանը համարեց, որ յուրաքանչյուր դեպքում առանձին կքննի:
«Սա շատ լուրջ խնդիր է, եւ դրանք որոշումներ են, որոնք լուրջ հետեւանքներ են ունենալու Հայաստանի համար: Որովհետեւ որեւէ երկիր եւ որեւէ դատարան չի կարող այնպիսի գործողություններ ձեռնարկել, որոնք կարող են սպառնալ ԵԽԽՎ պատգամավորի անձեռնմխելիությանը: Դատարանը շարունակում է անհիմն որոշումներ կայացնել: Մենք տեսանք նաեւ, որ դատարանը եւս մեկ շաբաթ ժամանակ տվեց գործի 128 հատորներին ծանոթանալու համար: Այսինքն` ընդհանուր երկու շաբաթ: Եթե ինչ-որ մեկը կարող է ծանոթանալ երկու շաբաթվա ընթացքում, իսկ դա ընդամենը 10 աշխատանքային օր է, ես նման հնարավորություններ չունեմ: Ակնհայտ է, որ դատարանն այնպիսի գործողություններ է ձեռնարկում, որոնք չեն բխում Քրեական դատավարության օրենսգրքից: Կարծում եմ, որ սա այն դատարանը չէ, եւ` արդեն երկար ժամանակ, որը կարող է արդարադատություն իրականացնել»,- ընդգծեց Լուսինե Սահակյանը:
