Հայաստանի առողջապահության նախարարության վերակենդանացման ֆոնդի մահճակալները ավելի քան 90%-ով զբաղված են: Այս մասին հոկտեմբերի 6-ին Ազգային ժողովի նիստում կառավարության ժամին ասաց առողջապահության նախարար Անահիտ Ավանեսյանը՝ պատասխանելով պատգամավորների հարցերին:
Նախարարի խոսքով՝ 2446 մահճակալից 2300-ը զբաղված են: «Այնուամենայնիվ, մեր երկրում պատվաստումների տեմպերն աճում են: Անցյալ շաբաթ պատվաստվել է 15 000 մարդ: Ցավոք, շատ, այսպես կոչված, «մասնագետներ» անընդհատ հայտարարություններ են անում պատվաստումների եւ հակահամաճարակային կանոնների պահպանման դեմ՝ շահարկելով հասարակական կարծիքը: Ես նրանց խորհուրդ կտամ այցելել «Գրիգոր Լուսավորիչ» բժշկական կենտրոն եւ տեսնել, թե ինչպես են մեր ինֆեկցիոնիստ բժիշկները պայքարում կյանքի համար»,- հավելեց Ավանեսյանը:
