Արժե մտածել հայ-ռուսական հարաբերություններում աճող դիսբալանսի վերացման ուղղությամբ։ Այս մասին այսօր՝ հոկտեմբերի 15-ին, «Հայաստան եւ Ռուսաստան։ Նոր ռազմավարության հրամայականը» աշխարհաքաղաքական նստաշրջանի ժամանակ հայտարարեց Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը:
«Այստեղ աշխատելու շատ բան կա»,-ասաց նա: Նրա խոսքով` թեման (նիստերի,-խմբ.) շատ արդիական է ոչ թե այն պատճառով, որ հաջորդ տարի նշվելու է Հայաստանի եւ Ռուսաստանի միջեւ դիվանագիտական հարաբերությունների հաստատման 30-ամյակը եւ «Բարեկամության, համագործակցության եւ ՌԴ-ի եւ ՀՀ-ի միջեւ փոխօգնության մասին» համաձայնագրի կնքման 25-ամյակը, այլեւ այն պատճառով, որ կյանքն ինքն է դա թելադրում:
«Մրցակցությունն աճում է՝ երբեմն ձեռք բերելով շատ դրամատիկ ձեւեր, որոնք միշտ չէ, որ ընդունելի են դիվանագիտական եւ միջազգային հարաբերությունների տեսանկյունից։ Պայքարը դառնում է բազմակողմանի: Այս պայմաններում ավանդական դաշնակիցների հարաբերությունները, դարեր շարունակ փորձարկված հարաբերությունները էլ ավելի արդիական են դառնում: Հուսով եմ, որ Ռուսաստանի եւ Հայաստանի բնակչության մեծամասնությունը զգում է այդ հարաբերությունների արժեքը: Սա մեր ընդհանուր ժառանգությունն է, որը, վստահ եմ, օգնում է եւ կօգնի մեզ ավելի հաջողությամբ պաշտպանել մեր շահերը այս դժվար աշխարհում: Խորը, պատմության մեջ արմատավորված եւ մեր ժամանակների մարտահրավերներին համապատասխանող երկկողմ հարաբերությունների համալիրը մեր ընդհանուր ինտեգրացիոն կառույցների շրջանակներում մեր ընդհանուր ժառանգությունն է: Սակայն նոր իրողությունները, կտրուկ փոփոխվող իրողությունները, որակապես փոփոխվող իրողությունները այլ մոտեցում են պահանջում մեր հարաբերություններում»,-ընդգծեց դեսպանը: