Բելգիայի կենդանաբանական այգին հայտնել է, որ երկու գետաձի տեղափոխվել է կարանտին կորոնավիրուսի թեստի դրական արդյունքից հետո, տեղեկացնում է BBC-ը:
Հայտնի չէ՝ ինչպես են գետաձիները վարակվել վիրուսով, հայտարարել են Անթվերփենի կենդանաբանական այգում՝ հավելելով, որ կենդանիների ինքնազգացողությունը լավ է, նրանց մոտ միայն հարբուխ է: Կենդանաբանական այգում սահմանափակումները խստացվել են կենդանիների հիվանդության ընթացքում: Աշխատակիցնրեը պետք է կրեն դիմակներ ու պաշտպանիչ ակնոցներ, ինչպես նաեւ ախտահանեն իրենց կոշիկները գետաձիների հետ աշխատանքից առաջ:
«Որքան ինձ հայտնի է, դա այդ տեսակի շրջանում առաջին գրանցված վարակումն է: Ամբողջ աշխարհում այդ վիրուսը հիմնականում գրանցվել է մարդանման կապիկների ու կատվազգիների մոտ»,-ասել է անասնաբույժ Ֆրենսիս Վերքամենը:
Ավելի վաղ այս շաբաթ Կանադայում նույնպես հաստատվել էր, որ կորոնավիրուսի երեք դեպք է հայտնաբերվել վայրի եղջերուների շրջանում, որը համարվում է առաջին այդպիսի դեպքը:
