Չինաստանի հյուսիս-արեւմուտքում Չինական մեծ պատի երկու մետրանոց հատվածը փլուզվել է 6,9 մագնիտուդ ուժգնությամբ երկրաշարժի հետեւանքով, հայտնում է ՏԱՍՍ-ը՝ հղում անելով Global Times-ին։

Հունվարի 8-ին Ցինհայ նահանգի Մենյուան-Հուի ինքնավար շրջանում ուժեղ երկրաշարժ է տեղի ունեցել։ Դրանից հետո իշխանությունները սեյսմիկ ակտիվությունից տուժած տարածաշրջանի մշակութային ժառանգության օբյեկտների վիճակի ստուգում են կազմակերպել։ Տեսուչները հայտնաբերել են Չինական Մեծ պատի փլուզված հատվածը հարեւան Գանսու նահանգի Շանդան կոմսությունում: Փլուզումը տեղի է ունեցել երկրաշարժի էպիկենտրոնից 114 կմ հեռավորության վրա։ 

Պատի փլուզված հատվածը կառուցվել է Մին դինաստիայի օրոք (1368 - 1644 թթ.): Վերականգնողներն արդեն պաշտպանիչ կառույց են կանգնեցրել այդ տարածքում եւ սկսել են վերականգնողական աշխատանքները։