Շաբաթ օրը Ստոկհոլմում, Գեթեբորգում եւ Շվեդիայի այլ քաղաքներում քովիդ-անձնագրերի դեմ բազմահազարանոց ցույցեր են տեղի ունեցել։ Ցույցերի կազմակերպիչը «Շարժում հանուն ազատության» կազմակերպությունն է, հաղորդում է TT գործակալությունը, փոխանցում է ՏԱՍՍ-ը։
Ստոկհոլմում ցույցին մասնակցելու պատրաստակամություն է հայտնել մոտ 18 000 մարդ, մինչդեռ անցկացման վայրում՝ Սերգելտորգի կենտրոնական հրապարակում, թույլատրված է 3000-ից ոչ ավելի մարդու ներկայություն։ Հավաքվածները վանկարկել են «Ազատությանը՝ այո, պատվաստման անձնագրերին՝ ոչ»։ Ժամանակ առ ժամանակ հրթիռներ են օդ բարձրացել ու բենգալյան կրակներ վառվել։
Գեթեբորգում, ըստ ոստիկանության, մեկից մինչեւ 1,5 հազար ցուցարար է հավաքվել Գուստաֆ Ադոլֆս Տորգի կենտրոնական հրապարակում։ Տեղի ոստիկանության ներկայացուցիչ Քրիստեր Ֆուքսբորգի խոսքով՝ ցույցի կազմակերպիչները դրա անցկացման թույլտվության համար չեն դիմել քաղաքային իշխանություններին։ Այդուհանդերձ, գեթեբորգյան ոստիկանությունը նախապես է պատրաստվել այդ միջոցառմանը։
Հարցին, թե կցրի արդյոք ոստիկանությունը ցույցը թույլտվության բացակայության պատճառով, Ֆուքսբորգը բացասական պատասխան է տվել։ «Եթե ամեն ինչ լինի խաղաղ եւ հանգիստ, եւ նրանք (ցուցարարները) անեն այն ամենը, ինչ մենք ասում ենք, ապա ամեն ինչ կանցնի առանց մեր միջամտության»,- պարզաբանել է նա։