Ֆրանսիան, Մեծ Բրիտանիան եւ Գերմանիան շաբաթ օրը նախազգուշացրել են Ռուսաստանին, որ Իրանի հետ առեւտուրը երաշխավորելու նրա պահանջները ձախողման սպառնալիքի տակ են դնում գրեթե ավարտված միջուկային համաձայնագիրը, հայտնում է Reuters-ը։
Բանակցությունները հասել են Գործողությունների համատեղ համապարփակ ծրագրի (ԳՀՀԾ) վերականգնման քննարկումների վերջին փուլին։ ԳՀՀԾ-ն կվերացնի Իրանի դեմ պատժամիջոցները՝ նրա միջուկային այն ծրագրի սահմանափակման դիմաց, որը Արեւմուտքը երկար ժամանակ համարում էր որպես ատոմային ռումբերի մշակման քողարկում:
Սակայն, անցյալ շաբաթ օրը Ռուսաստանի արտգործնախարար Սերգեյ Լավրովը անսպասելիորեն պահանջեց լայն երաշխիքներ, որ Իրանի հետ ռուսական առեւտուրը չի տուժի Մոսկվայի նկատմամբ կիրառվող պատժամիջոցներից, որոնք սահմանվել են Ուկրաինա ներխուժման հետեւանքով, նշում է լրատվական գործակալությունը։
«Ոչ ոք չպետք է փորձի ԳՀՀԾ-ի շուրջ բանակցությունները օգտագործել այնպիսի երաշխիքներ ստանալու համար, որոնք համաձայնագրի մաս չեն հանդիսանում»,- ասվում է 2015-ից համաձայնագրին մասնակցող Ֆրանսիայի, Մեծ Բրիտանիայի եւ Գերմանիայի համատեղ հայտարարության մեջ:
«Սա հղի է գործարքի փլուզմամբ»,- ասել են նրանք:
Սեղանին դրված գործարքը պետք է շտապ կնքվի, հավելել են նրանք։
Ավելի վաղ Վաշինգտոնն արդեն հայտարարել էր, որ չի համաձայնի Ռուսաստանի պահանջներին։
11 ամիս տեւող միջազգային բանակցությունների նպատակը Իրանին սահմանափակումների պահպանման գործարքին վերադարձնելն է եւ ԱՄՆ-ին համաձայնագրին վերադարձնելը, որից նա դուրս էր եկել 2018թ․՝ նախկին նախագահ Դոնալդ Թրամփի օրոք:
Նավթի շուկաները ուշադիր հետեւում են բանակցությունների ընթացքին, որպեսզի հասկանան կարող են արդյոք հանվել իրանական նավթի արտահանման սահմանափակումները, ինչը կարող է օգնել փոխհատուցել Ուկրաինայում տիրող իրավիճակի պատճառով մատակարարման խափանումները: