Նման միջոցառումները յուրահատուկ հարթակ են մեզ համար՝ հանդիպելու ոլորտի ներկայացուցիչների հետ եւ քննարկելու ոլորտի խնդիրները: Այս մասին, այսօր՝ հունիսի 22-ին, Orion-2022 գագաթնաժողովի շրջանակում լրագրողների հետ զրույցում նշեց ԲՏԱ փոխնախարար Դավիթ Սահակյանը:
«Այլ ավելի արդյունավետ գործիքակազմ, քան այս շփումները, ցավոք, չկա: Սա յուրահատուկ հարթակ է իրենց հետ հանդիպելու, քննարկելու, պանելային քննարկումների միջոցով բացահայտելու ոլորտի խնդիրները, եւ ոլորտի ներկայացուցիչների հետ փորձենք գտնել այդ խնդիրներին լուծումներ: Սա շատ արդյունավետ գործիք է: Երկրորդը, եւ այս հարթակն օգտագործելով կառավարությունը, մեր նախարարությունը հնարավորություն ունի ներկայացնելու իր ծրագրերն ու պլանները, որ մեր ծրագրերը համահունչ լինեն ոլորտի կարիքներին, համապատասխանեն ապագա բրենդներին»,-ասաց նա:
Հարցին, թե ի՞նչ է անում նախարարությունը նորարարությունների միջոցով պետական կառավարման համակարգի աշխատանքը ավելի արդյունավետ դարձնելու համար, փոխնախարարը պատասխանեց. «Մենք այս պահին ունենք «գաղափարից բիզնես» ծրագիր, որով դրամաշնորհ ենք տալիս ստատափներին, եւ գաղափարի մակարդակում գտնվող ստատափներին, եւ շուկա մտնելու մակարդակի ստարտափների համար: Մենք տրամադրում ենք դրամաշնորհը, տալիս ենք այդ ընկերությանը թրեյնինգ, թե ինչպես արդյունավետ օգտագործի այդ ռեսուրսները եւ հասնի իր դրած նպատակին: Իսկ երբ արդեն մտել է շուկա, մենք այդ փուլում իրենց «տալիս ենք» ներդրողներին, ֆոնդերին (ֆոտոռեպորտաժ):
Երկրորդը, որ անում ենք դասընթացներն են: Այս տարի ընտրել ենք 4-5 ոլորտներ եւ այդ ոլորտներում մասնագետներ ենք պատրաստում, որ աշխուժացնենք դրանք: Մասնավորապես, արհեստական բնականության մասով մասնագետներ ենք պատրաստում՝ հաշվի առնելով, որ այդպիսի մասնագետների կարիքը շատ մեծ է: Մեծ է պահանջարկը նաեւ բլոքչեյնի, կիբերանվտանգության մասնագետների: Այս տարի ներդրել ենք նաեւ ինժեներության ուղղվածությունը: Մարդիկ գնահատում են, որ ոլորտը զարգացող է, աշխատավարձերի մակարդակն ավելի բարձր է, եւ մարդիկ փորձում են սովորել ու աշխատել այդ ոլորտում»:
Անդրադառնալով ՏՏ ոլորտում կադրերի պակասի խնդիրին, փոխնախարարն ասաց. «Սա իրավիճակ է, որը բնորոշ է ամբողջ աշխարհին: Ամբողջ աշխարհում կա մասնագետների այդ պակասը: Այստեղ մեր ծրագրերով խթանում է, որ ընկերությունները մասնագետներ ներգրավեն, այդ թվում դրսից, մասնագետներ պատրաստեն եւ մտնեն շուկա: Փորձում ենք այդ ճեղքվածքը մինիմիզացնել»:
Առավել մանրամասն՝ տեսանյութում