Ավելի քան վստահ եմ, որ գործող իշխանությունների կողմից անցկացված ոչ մի ընտրություն չի կարող լինել ազատ ու արդար, եւ չի կարող հանգեցնել Հայաստանում խորը քաղաքական ճգնաժամի հաղթահարման։ Այս մասին հունիսի 23-ին տեղի ունեցած քննարկման ժամանակ ասաց Հայաստանի Հանրապետական կուսակցության ներկայացուցիչ, նախկին պատգամավոր Գագիկ Մինասյանը։
Նա հիշեցրեց ՀՀԿ-ի նախորդ տարվա դիրքորոշումը, որ արտահերթ խորհրդարանական ընտրությունները չեն հանգեցնի քաղաքական ճգնաժամի հաղթահարման, եւ իշխող ուժն ամեն ինչ կանի, որ տպավորություն ստեղծվի, որ ժողովուրդն իրեն մանդատ է տալիս։ «Պարզվեց, որ մենք ճիշտ էինք, բայց ընտրությունների գնալու բոլոր հիմնական ուժերի որոշման ֆոնին ՀՀԿ-ն չէր կարող իր համախոհներին մենակ թողնել եւ չմասնակցել»,- հավելեց Մինասյանը։
Նրա գնահատմամբ՝ հետագա իրադարձությունները ցույց տվեցին, որ արտահերթ խորհրդարանական ընտրությունները ոչ միայն չհանգուցալուծեցին քաղաքական ճգնաժամը, այլեւ էլ ավելի խորացրին այն։
Քաղաքական գործիչը վստահություն հայտնեց, որ խնդիրների լուծմանը կարելի է հասնել ժամանակավոր կառավարության ձեւավորման միջոցով, որն էլ պետք է կազմակերպի ընտրությունները։
«1,5 ամիս անց հասարակական դիմադրությունը թեւակոխում է կազմակերպչական նոր փուլ՝ փորձելով կապ հաստատել բնակչության բոլոր շերտերի հետ։ Այս ընթացքում ձեռք բերված գիտելիքների հիման վրա մենք պատրաստվում ենք համախմբել հանրությանը եւ երկիրը տանել ազգի համար սպառնալիք հանդիսացող այս չարիքից ազատագրման ճանապարհով։ Պետք է ներգրավել այնպիսի թվով մարդկանց, որոնք ոչ միայն դուրս կգան հրապարակներ, այլեւ անհանդուրժողականության մթնոլորտ կստեղծեն այն մարդկանց նկատմամբ, ովքեր նպաստում են այս գործընթացի արգելակմանը»,- եզրափակեց նախկին պատգամավորը։