Ավելի քան 40 հայ եւ ադրբեջանցի մասնագետ հունիսի 29-30-ը կլոր սեղան են անցկացրել Եվրամիության (ԵՄ) աջակցությամբ, հաղորդում է commonspace.eu կայքը։
Վրաստանի Կախրեթի քաղաքում կողմերը քննարկել են խաղաղ Հարավային Կովկասի ապագայի հնարավոր սցենարները։
Քննարկումները վերաբերում էին տնտեսության եւ կապի, անվտանգության, կառավարման ոլորտներին եւ մշակութային քաղաքականությանը։ Կողմերը նաեւ գնահատել են հնարավոր քայլերը, որոնք կարող են ձեռնարկվել ազգային կառավարությունների, քաղաքացիական հասարակության եւ արտաքին դերակատարների կողմից՝ հայերի եւ ադրբեջանցիների միջեւ երկարաժամկետ խաղաղության առջեւ ծառացած բազմաթիվ խնդիրների լուծման հեռանկարների բարելավման համար:
Հարավային Կովկասի եւ Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը վերահաստատել է ԵՄ-ի շարունակական հանձնառությունը «կայուն խաղաղությանը»:
Նա խոստովանել է, որ հայ-ադրբեջանական հարաբերությունների ապագայի վերաբերյալ քննարկումներն ուղեկցվում են բազմաթիվ մարտահրավերներով եւ բուռն հույզերով։
Հատուկ ներկայացուցիչը ողջունել է երկխոսության հաստատմանը, վստահության ձեւավորմանը եւ արմատացած նարատիվներին դիմակայելուն ուղղված ջանքերը շարունակելու կողմերի վճռականությունը, որոնք խոչընդոտում են ոչ միայն հայ-ադրբեջանական հարաբերությունների բարելավմանը, այլեւ ամբողջ Հարավային Կովկասի խաղաղ եւ բարգավաճ ապագային: