ՌԴ ԱԳ նախարար Սերգեյ Լավրովը կոչ է արել կանխել նոր ռազմական գործողությունների սկիզբը Սիրիայի հյուսիսում, Դամասկոսի եւ Անկարայի համար կարեւոր է համաձայնության գալ՝ օգտագործելով գոյություն ունեցող կապուղիները, փոխանցում է «ՌԻԱ Նովոստի»-ն։
«Ինչ վերաբերում է հարցին, թե ինչպես կարող է զարգանալ իրավիճակը Սիրիայի Արաբական Հանրապետության հյուսիսում, ապա կարեւորը նոր ռազմական գործողությունների կանխումն է, դիվանագիտական ուղիներով բանակցելը՝ քաղաքական սկզբունքների հիման վրա, որոնք եւ նախկինում կային Սիրիայի եւ Թուրքիայի հարաբերություններում»,- ասել է Լավրովը Սիրիայի արտգործնախարարի հետ մամուլի ասուլիսին։
Լավրովը հիշեցրել է, որ այդպիսի պայմանավորվածություններ երկու երկրների միջեւ ձեռք էին բերվել 1998-ին՝ ահաբեկչական սպառնալիքի նվազեցման նպատակով։ «Սիրիայի Արաբական Հանրապետությունն ընդունում է դա եւ պատրաստ է ամբողջությամբ պատասխանատվություն կրել իր ինքնիշխան տարածքի համար դրա նկատմամբ լիակատար վերահսկողության վերականգնումից հետո։ Մենք այդ դիրքորոշմանն աջակցում ենք»,- ասել է նա։