Հայաստանը ՀԱՊԿ-ին դիմել է պայմանագրի չորրորդ կետով եւ այս պահի դրությամբ ՀԱՊԿ-ից չի ստացվել ադեկվատ աջակցություն: Այս մասին այսօր՝ սեպտեմբերի 19-ին, Հանրային հեռուստաընկերությանը տրված հարցազրույցում հայտարարեց ԱԺ փոխխոսնակ Ռուբեն Ռուբինյանը:
«Նախ մենք պետք է հասկանանք, թե ինչպիսինն են մեր սպասելիքները ՀԱՊԿ-ից, երբ հարձակում է տեղի ունենում մեր ինքնիշխան տարածքի վրա եւ ներխուժում՝ ՀՀ միջազգայնորեն ճանաչված սահման: Առաջին հերթին՝ ագրեսիայի ֆիքսում: Երկրորդ՝ դատապարտում, երրորդ՝ ագրեսիայի հետեւանքների վերացում, չորրորդ՝ պահանջի չվերաբերման դեպքում կոնկրետ գործողություններ: Ցավոք, մենք չենք կարող արձանագրել, որ մեր ակնկալիքներն այս պահի դրությամբ արդարացված են: Պետք է հասկանալ՝ դրանք արդարանալու են, թե՝ ոչ, եւ ըստ դրա անել հետեւություններ: Մենք ունենք օրինակ, երբ իրավիճակի ֆիքսումը եւ արձանգանքը տեղի ունեցավ մի քանի ժամվա ընթացքում՝ Ղազախստանում տարվա սկզբին տեղի ունեցած իրադարձությունների մասին է խոսքը»,- ասաց Ռուբինյանը:
Հիշեցնենք, որ սեպտեմբերի 16-ին լրատվամիջոցներից մեկին տրված հարցազրույցում ՀԱՊԿ-ի արձագանքը Հայաստանի դիմումին ոչ պատշաճ էր համարել նաեւ ԱԽ քարտուղար Արմեն Գրիգորյանը: Մասնավորապես, նա ասել էր, որ երբ ՀԱՊԿ–ն Ղազախստան զորք ուղարկեց, դրանով վերջապես գործարկվեցին ՀԱՊԿ-ի արագ արձագանքման մեխանիզմները, սակայն հիմա՝ հայ–ադրբեջանական սահմանին տիրող իրավիճակի պարագայում այդ հույսն այլևս չկա։ Հակառուսական հայտարարություններով են հանդես եկել նաև իշխանական որոշ պատգամավորներ:
