Կապանում Իրանի գլխավոր հյուպատոսությունը Հայաստանի եւ Իրանի ջերմ հարաբերությունների ցուցանիշ կլինի եւ կարեւոր նշանակություն կունենա տարածաշրջանում խաղաղության եւ անվտանգության ապահովման համար։ Հոկտեմբերի 21-ին Կապանում Իրանի գլխավոր հյուպատոսության բացման արարողության ժամանակ այս մասին ասաց Հայաստանի արտգործնախարար Արարատ Միրզոյանը։
Նա նշեց, որ Հայաստանը բարձր է գնահատում գլխավոր հյուպատոսություն բացելու Իրանի որոշումը Սյունիքի մարզում, որը հանդիսանում է Հայաստանի ողնաշարը։
«Այսօր նշանակալի օր է հայ-իրանական բարեկամական հարաբերությունների բազմադարյա պատմության մեջ։ Կապանում Իրանի գլխավոր հյուպատոսության բացումը եւ նրա արդյունավետ գործունեությունը նոր որակ կհաղորդեն երկու երկրների առանձնահատուկ հարաբերություններին, կխթանեն համագործակցությունը եւ կնպաստեն հայ-իրանական կապերի զարգացմանը։
Հատկանշական է, որ այս կարեւոր իրադարձությունը տեղի է ունենում Հայաստանի եւ Իրանի միջեւ հարաբերությունների հաստատման 30-ամյակին։ 30 տարիների ընթացքում մեր անցած ճանապարհը նշանավորվել է ռազմավարական բնույթի հարաբերությունների, բարեկամության եւ սերտ գործընկերության անկեղծ ցանկությամբ: Վստահ եմ, որ այսուհետ կգործադրվեն բոլոր անհրաժեշտ ջանքերը փոխշահավետ համագործակցության խորացման եւ ամրապնդման համար»,- ընդգծեց նախարարը։
