50 միլիարդ դոլարի ներդրումային համաձայնագրեր են կնքվել Էր Ռիադ Չինաստանի նախագահ Սի Ծինփինի կատարած այցի ընթացքում։ Համաձայնագրերը վերաբերում են ինչպես մասնավոր, այնպես էլ պետական հատվածներին, Bloomberg-ին ասել է ներդրումների նախարար Խալիդ ալ Ֆալիհը։ Նա չի հստակեցրել, թե արտացոլում է արդյոք այդ թիվը նաեւ արաբական այլ երկրների հետ կապված համաձայնագրերը, որոնց առաջնորդները նույնպես մասնակցել են չինական պատվիրակության հետ հանդիպումներին:
Անցյալ շաբաթվա գագաթաժողովը, որտեղ Չինաստանի նախագահ Սի Ծինփինը հանդիպել է Սաուդյան Արաբիայի թագաժառանգ արքայազն Մուհամմեդ բեն Սալմանի հետ, ցույց է տվել Պեկինի հետ Պարսից ծոցի երկրների կապերի խորացումը: Բայց թեեւ այցի ընթացքում Չինաստանի եւ Մերձավոր Արեւելքի միջեւ միասնականության մասին ջերմ խոսքեր են հնչել, հայտարարված համաձայնագրերի մեծ մասը փոխըմբռնման մասին հուշագրեր են եղել, որոնք չունեն հստակ ժամկետներ կամ պարտավորություններ:
Չինաստանը ձգտում է ամրապնդել Սաուդյան Արաբիայի եւ նրա հարեւանների հետ էներգետիկ քաղաքականության եւ հետախուզության համակարգումը: Թագավորությունը Ռուսաստանի հետ միասին OPEC+-ի՝ արտադրողների կարտելի առաջնորդ է, որն արդյունահանում է համաշխարհային նավթի գրեթե կեսը:
