Հատուկ քրեակատարողական ծառայության բժշկական դեպարտամենտի ղեկավար Մալխազ Ուրտկմելիձեի խոսքով՝ դատարանի կողմից գերատեսչությանը տրամադրված «Էմպատիա» կենտրոնի եզրակացության մի մասի համաձայն՝ դատապարտված Միխայիլ Սաակաշվիլու թունավորման փաստը չի հաստատվել, հաղորդում է Վրաստանի Առաջին ալիքը:
Ինչպես լրագրողներին հայտնել է Ուրտկմելիձեն, ներկայացված փաստաթղթերի համաձայն՝ Միխայիլ Սաակաշվիլու օրգանիզմում թունավոր նյութ չկա, եւ բոլոր ցուցանիշները նորմայից կտրուկ ցածր են:
«NMS Labs լաբորատորիայի կայքում, որտեղ կատարվել են հետազոտություններ, եւ արդյունքները գաղտնի չեն եւ հասանելի են բոլորի համար, նշված է ինչպես նվազագույն սահմանը, այնպես էլ թույլատրելի նորման։ Պարզվել է, որ այդ լաբորատորիայում նրանց տրամադրած թվերը, այսինքն՝ արդյունքը, նորմայից ցածր են։ Այդ փաստաթուղթը վկայում է այն մասին, որ օրգանիզմում թունավոր նյութ թունավոր քանակությամբ չկա»,-ասել է նա։
