Պակիստանը հունվարին ծովով 159 կոնտեյներ զենք կուղարկի Ուկրաինա, գրում է The Economic Times-ը։

Հաղորդվում է, որ Պակիստանից մատակարարումները կներառեն 155 մմ տրամաչափի հաուբիցային արկեր, M4A2 շարժիչային լիցքեր, M82 հրետանային պարկուճներ եւ PDM պայթուցիչներ: Ենթադրվում է, որ բեռներով նավը դուրս կգա Կարաչի նավահանգստից եւ կմեկնի լեհական Գդանսկ, իսկ այնտեղից զինամթերքը կհասցվի Ուկրաինա։

Ինչպես նշում է The Economic Times-ը, դրա դիմաց Իսլամաբադն ակնկալում է, որ Ուկրաինան կօգնի արդիականացնել նախկինում Պակիստանին վաճառված «Մի-17» մարտական ուղղաթիռները, ինչպես նաեւ վերանորոգել 320 T-80UD տանկերից բաղկացած պարկը:

Թերթն ընդգծում է, որ երկու երկրներին կապում է սերտ համագործակցությունը ռազմական ոլորտում. 1991-2020 թվականներին Կիեւը եւ Իսլամաբադը 1,6 միլիարդ դոլարի սպառազինության մատակարարումների պայմանագրեր են կնքել։