Անհրաժեշտ է կազմակերպել օտարերկրյա դեսպանների այցը Գորիս։ Մենք պետք է փորձենք նրանց ներկայությամբ հումանիտար բեռ ուղարկել Լեռնային Ղարաբաղ։ Փետրվարի 3-ին Ազգային ժողովում Ադրբեջանի կողմից Լաչինի միջանցքը փակելու թեմայով խորհրդարանական լսումների ժամանակ, որոնք գումարվել են խորհրդարանական ընդդիմության նախաձեռնությամբ այս մասին ասաց Դեմոկրատական կուսակցության նախագահ Արամ Սարգսյանը։
Քաղաքական գործչի խոսքով՝ ադրբեջանցիներին ջրի երես հանելու համար Հայաստանի իշխանությունները պետք է մի քանի պարզ բան անեն։ Մասնավորապես, անհրաժեշտ է Գորիս հրավիրել Հայաստանում հավատարմագրված բոլոր օտարերկրյա դեսպաններին։
«Ի դեպ, չմոռանանք նաեւ Հայաստանում ԵՄ պատվիրակության ղեկավար տիկին Վիկտորինի մասին։ Տեսնենք՝ կարո՞ղ ենք բեռ հասցնել Լեռնային Ղարաբաղ, թե՞ ոչ։ Հիմա գործելու ժամանակն է»,- ասաց Սարգսյանը։
Հիշեցնենք, որ «Հայաստան» համահայկական հիմնադրամի կողմից Լեռնային Ղարաբաղի համար հավաքված մարդասիրական օգնությունը Գորիսում է։ Ադրբեջանցի «էկոակտիվիստների» կողմից ճանապարհը փակելու պատճառով բեռի առաքումն անհնար է դարձել։