Վրաստանի նախկին նախագահ Միխեիլ Սաակաշվիլու մայրը՝ Գիուլի Ալասանիան, ասել է, որ չգիտի այնպիսի դերասանների, որոնք կարող են ամիսներով բարձր ջերմություն ցուցադրել եւ կիսով չափ նվազեցնել իրենց քաշը, գրում է «Նովոստի Գրուզիան»։ Նրա խոսքով՝ Վրաստանի կառավարությունն այնքան չի հավատում իր որդուն, որ կհրաժարվի ընդունել նրա հնարավոր մահը։

«Ո՞ր դերասանը կարող է ցուցադրել մշտական տաքություն: Դուք գիտե՞ք աշխարհում մի դերասանի, որը կարող է այնպես անել, որ ամիսներով ջերմություն ունենա, այնպես խաղալ, որ քաշը կիսով չափ պակասի։ Ես չգիտեմ այդպիսի դերասանների։ Եթե նա ի վերջո մեռնի, դագաղի մեջ պառկի, էլի կասեն, որ դեր է խաղում»,- ասել է Ալասանիան։

Ինչպես նշել է Սաակաշվիլու մայրը, քաղաքական գործչին կասկածում են երկրում հեղափոխություն եւ «արյունահեղություն» կազմակերպելու ցանկության մեջ։ Նա նաեւ հավելել է, որ չի հասկանում նման կասկածների պատճառները՝ հաշվի առնելով նրա անցյալը։

«Ասում են՝ եկել է արյունահեղություն կազմակերպելու։ Կներեք, ո՞վ է տեսել նրա կազմակերպած արյունահեղությունը։ «Վարդերի հեղափոխությունն» այնպես կատարվեց, որ ոչ մեկի վրա քերծվածք չեղավ։ Ի՞նչ արյունահեղության մասին է խոսքը»,- ընդգծել է Ալասանիան։