Եմենում հակամարտող կողմերը պատմական փոխանակման շրջանակներում պայմանավորվել են 887 ձերբակալվածների ազատ արձակման մասին: «ՌԻԱ Նովոստի»-ի փոխանցմամբ՝ այս մասին Ժնեւում կայացած ճեպազրույցում ասել է Եմենի հարցերով ՄԱԿ-ի գլխավոր քարտուղարի հատուկ բանագնաց Հանս Գրունդբերգը։
«Եմենում հակամարտող կողմերը երկուշաբթի օրը պայմանավորվել են 887 գերիների պատմական փոխանակման շուրջ։ Բանակցություններն ավարտվել են այս երկուշաբթի»,- ասել է նա:
Գրունդբերգը հրաժարվել է նշել, թե յուրաքանչյուր կողմից քանի բանտարկյալ է ներառված այս համաձայնագրում: Ավելի վաղ հութիների կողմից ստեղծված ռազմագերիների հարցերով ազգային կոմիտեի ղեկավար Աբդել Քադիր ալ-Մուրթադան ասել էր, որ բանտարկյալների հետ կապված դոսյեի շուրջ բանակցություններն ավարտվել են, եւ պայմանավորվածություն է ձեռք բերվել հակառակ կողմի 181 գերիների հետ 706 հութիների փոխանակման շուրջ։ 2015 թվականից Եմենում ակտիվ ռազմական գործողություններ են ընթանում հութիների կողմի ուժերի եւ երկրի կառավարության բանակի միջեւ, որին աջակցում է Սաուդյան Արաբիայի գլխավորած արաբական կոալիցիան։
