Բելառուսի նախագահ Ալեքսանդր Լուկաշենկոն հայտարարել է, որ հատուկ ծառայությունները հատուկ գործողության ժամանակ Գրոդնոյում հայտնաբերել են զինանոց եւ պայթուցիկներ, որոնք նախատեսված են եղել քաղաքացիների եւ պաշտոնյաների դեմ ահաբեկչությունների համար։
«Հատուկ ծառայությունները փայլուն են գործել։ Առգրավվել են զինանոց եւ պայթուցիկներ, որոնք նախատեսված էին «աղմկալի» ահաբեկչությունների համար քաղաքացիների եւ պետական մարմինների պաշտոնյաների դեմ,- երեքշաբթի ասել է Լուկաշենկոն երկրի ուժայինների հետ խորհրդակցության ժամանակ, տեղեկացրել է «ԲելՏԱ»-ն իր Թելեգրամ-ալիքում։- Կեցցեն մեր տղաները. այնպիսի սուր իրավիճակում, երբ ահաբեկիչների կողմից կիրառվել են նռնակներ եւ զենք, «Ալֆայի» ոչ մի աշխատակից չի զոհվել։ Լավ գործողություն է, լավ աշխատանք»։
Նրա խոսքով՝ սա «հերթական ազդանշանն էր»։ «Մենք պետք է պատրաստ լինենք ցանկացած իրադարձության»,- ասել է Լուկաշենկոն։
Ավելի վաղ տեղեկացվել էր, որ Բելառուսի Պետական անվտանգության կոմիտեի աշխատակիցները Գրոդնոյում վնասազերծել էին երկրի տարածք թափանցած զինված օտարերկրացու, որն ահաբեկչություն էր նախապատրաստում։ Օտարերկրացին, ավտոմատ զենքի կիրառմամբ եւ մարտական նռնակների պայթեցման միջոցով զինված դիմադրություն էր ցույց տվել Պետական անվտանգության կոմիտեի «Ա» խմբի ստորաբաժանման մարտիկներին։ Կոմիտեի քննչական վարչությունը փաստով քրեական գործ է հարուցել։
