Մենք ժողովրդից ոչինչ չենք թաքցնում, ասում ենք այն, ինչ կա, ներկայացնում ենք այն լուծումները, որ ունենք եւ փորձում ենք ձեւավորել համագործակցային լայն դաշտ, որպեսզի Հայաստանը ինչպես 44-օրյա պատերազմի ժամանակ էր, հանկարծ մեկուսացման մեջ չհայտնվի: Թե ինչ է դրանից ստացվում, ժամանակը ցույց կտա: Այս մասին այսօր՝ մարտի 22-ին, ԱԺ-ում լրագրողների հետ զրույցում նշեց ՔՊ խմբակցության պատգամավոր Վիգեն Խաչատրյանը:
Դիտարկմանը, որ իշխանությունը խաղաղություն էր խոստանում, բայց հիմա հայտարարում է, որ այդ խաղաղությունը երաշխավորված չէ, Վիգեն Խաչատրյանն ասաց. «Այնպես չէ, որ մենք ցանկացանք խաղաղություն, մյուսները համաձայնեցին: Ադրբեջանցիներին այդ խաղաղությունը ձեռք չի տալիս: Մենք հիմա խաղաղության պայմանագիրն այնպես ենք մշակում, որ իր մեջ չպրունակի պատերազմ սկսելու վտանգներ: Եթե անգամ մենք խաղաղության պայմանագիր ստորագրենք, դա երաշխիք չէ խաղաղության, որովհետեւ գործ ունենք շատ նենգ, մեծ հնարավորությունների տիրապետող, թշնամաբար տրամադրված հարեւանի հետ:
Զուգահեռաբար, մենք գիտակցում ենք, որ պատերազմից խուսափելու լավագույն ճանապարհը համարժեք բալանսավորված ուժային կառույց՝ բանակ ունենալն է, որով մենք հիմա զբաղված ենք»: