Ճապոնիայի իշխանությունները որոշում են ընդունել ապրիլի 29-ից չեղարկել կորոնավիրուսի պատճառով երկիր մուտքի բոլոր գործող սահմանափակումները։ Այս մասին ուրբաթ Տոկիոյում մամուլի ասուլիսի ժամանակ տեղեկացրել է Ճապոնիայի կառավարության գլխավոր քարտուղար Հիրոկաձու Մացունոն։
«Ապրիլի 29-ից չեղարկվում են մուտքի սահմանափակումները, ՊՇՌ-թեստ կամ պատվաստման հավաստագիր ներկայացնել այլեւս պետք չէ»,- հայտարարել է գլխավոր քարտուղարը։
Ներկայում սահմանը հատելու համար անհրաժեշտ է ներկայացնել COVID-19-ի դեմ ԱՀԿ-ի կողմից հավանության արժանացած պատվաստանյութերի երեք չափաբաժնով պատվաստման հավաստագիր կամ, եթե այդ հավաստագիրը չկա, տեղեկանք կորոնավիրուսի բացասական թեստի մասին, որն արվել է Ճապոնիա մուտքից 72 ժամ առաջ։ Մյուս բոլոր պահանջները եւ սահմանափակումները, ներառյալ կարանտինը, հանվել էին անցած տարի։
Սկզբում նախատեսվում էր, որ սահմանափակումները լիովին կչեղարկվեն մայիսի 8-ից, բայց կառավարությունը ժամկետը փոխել է, քանի որ Ճապոնիայում ապրիլի վերջին – մայիսի սկզբին երկարատեւ տոներ են, որոնք կոչվում են «ոսկե շաբաթ»։ Այդ շրջանում երկրի շատ բնակիչներ ճամփորդում են։ Բացի այդ, իշխանությունների որոշումը կապված է մայիսի 8-ին նախատեսված՝ կորոնավիրուսի կարգավիճակի վերանայման եւ այն ավելի քիչ վտանգավոր վիրուսների կարգ, ինչպիսին է սեզոնային գրիպը, տեղափոխելու հետ։
