2018-ի այս օրերին տեղի է ունեցել խաբեություն, մարդաորսություն, ապա նաեւ դավաճանություն: Այս մասին այսօր՝ մայիսի 2-ին, Ազգային ժողովում հայտարարությունների ժամին ունեցած ելույթում ասաց «Հայաստան» խմբակցության պատգամավոր Անդրանիկ Թևանյանը։
«2018 թվականին Հանրապետության հրապարակում տեղի է ունեցել «մատնոց ֆռցնոցի»: Մատնոց ֆռցնողները խաբել են ձեզ, ցույց են տվել մի բան, տակից արել են լրիվ ուրիշ բան, ձեզ փաստի առաջ են կանգնեցրել: 2018-ին քաղաքացին խաբվել է, բայց եղել է ճիշտ իր ձգտումներում, ցանկություններում, իր գործողություններում: 2018-ի քաղաքական փոփոխությունը սպասված էր և ընկալելի հանրության կողմից, սակայն լիդերի ընտրությունը սխալ էր, քանի որ տեղի ունեցավ պարզ խաբեություն, որը հետագայում վերածվեց դավաճանության»,- ,-ասաց նա:
Թեւանյանի խոսքով, դավաճանվեցին այն արժեքները, որոնց համար փողոց էին դուրս եկել մարդիկ. «Ձեզ պարզապես խաբեցին և իրենք դարձան ավելի վատը, քան քննադատում էին դրանից առաջ։ Ասացին՝ բերելու են սեր և համերաշխություն, բերեցին ատելություն և պառակտում, ձեզ պատերազմի օրերին խաբեցին՝ ասելով հաղթելու ենք, բերեցին պարտություն, ասացին՝ սիրում ենք բոլորիդ, հազարավորների թաղեցին, մի մասին էլ թողեցին անթաղ, երրորդ մասին դեռևս գերության մեջ են թողնում։ Ձեզ խաբեցին ու դավաճանեցին բոլոր այն հարցերում, որոնց համար ձեզ դուրս էին բերել պայքարի»,-ընդգծեց ընդդիմադիր պատգամավորը:
Նա ընդգծեց, որ հիմա էլ են խաբում քաղաքացիներին. «Ասում են հայ-թուրքական հարաբերություններն առանց նախապայմանների են։ Սուտ է, թուրքական նախապայմաններով այս պահին ԱՄՆ-ում բանակցում է այս իշխանությունների ԱԳ նախարարն ու բավարարում է Ադրբեջանի բոլոր պահանջները»,- ասաց Թևանյանը։
Նրա խոսքով, ամեն ինչ պետք է անել, որպեսզի 2018 թ. ժողովրդի սպասումները լինեն ճիշտ, լիդերը փոխվի, քանի որ սխալ ընտություն է։
«Ժողովուրդն ունի իր սխալն ուղղելու իրավունք և պատասխանտվություն»,- ասաց ընդդիմադիր պատգամավորը։