Այսօր՝ մայիսի 30-ին, ԱԺ-ում լրագրողները պաշտպանության նախարար Սուրեն Պապիկյանից փորձում էին մանրամասներ պարզել օրեր առաջ ԶՈՒ երկու զինծառայողների անհետացման մասին:
Լրագրողները հարցնում էին. «Ինչո՞ւ էին նրանք միայնակ», «Պարոն Պապիկյան, ձեր պահած բանակից զինվորներ են գողանում, մինչեւ ե՞րբ է այսպես շարունակվելու: Ինչպե՞ս եք ապահովում Հայաստանի պաշտպանությունը, եթե զինվորներին ամեն օր կարող են գողանալ», «Պարոն Պապիկյան, ինչու ՀԱՊԿ-ի նիստին չմասնակցեցիք»:
Նախարարը ոչ մի հարցի չպատասխանեց, նստեց վերելակն ու գնաց:
Ավելի վաղ NEWS.am-ը հայտնել էր, որ մայիսի 26-ին՝ ժամը 19:00-ից, մարտական դիրքեր սնունդ մատակարարող ՀՀ ԶՈՒ 2 զինծառայողի հետ կապն ընդհատվել է: Ավելի ուշ հաղորդվել էր, որ միջդիրքային ճանապարհին հայտնաբերվել է ՀՀ ԶՈՒ 2 զինծառայողների կողմից շահագործվող թիկունքային մատակարարման ավտոմեքենան, որը բեռնված էր սննդով և ջրով՝ նախատեսված մարտական հենակետերի համար:
Մայիսի 26-ին` ադրբեջանական լրատվամիջոցները, ապա Ադրբեջանի սահմանապահ ծառայությունը ապատեղեկատվություն տարածեցին այն մասին, թե իբր հայկական կողմը դիվերսիոն ներթափանցման փորձ է կատարել, ձերբակալվել են ՀՀ ԶՈՒ 2 զինծառայողներ:
Հայտնաբերված մեքենայում նաև առկա է զինծառայողներից մեկին ամրակցված զենքը, ինչը փաստում է, որ անգամ մեքենայից դուրս գալու և տեղանքում չկողմնորոշվելու դեպքում զինծառայողները չէին կարող դիվերսիոն նպատակներ ունենալ:
Ադրբեջանի կողմից հայ զինծառայողների ապօրինի առևանգման հանգամանքները բացահայտելու ուղղությամբ տարվում է լայնածավալ աշխատանք։:
ՀՀ ԶՈՒ 2 զինծառայողներն են Հարություն Յուրիկի Հովագիմյանը և Կարեն Աշոտի Ղազարյանը: