Պաշտպանության նախարարությունում այսօր՝ 17:00-ին, նախատեսվում է ՊՆ նախարար Սուրեն Պապիկյանի հանդիպումը Էջմիածնի «Քիմիկների զորամասի» անհետ կորած զինծառայողների ծնողների հետ: Այս մասին NEWS.am-ը տեղեկանում է անհետ կորածի ծնող Կարինե Մանավազյանը։
«Երեկ բավականին լարված է եղել երեկոյան, ծնողներին ասել են, որ այսօր նախարարը կընդունի, տեսնենք»,- ասաց անհետ կորածի ծնողը:
Հիշեցնենք, որ երեկ անհետ կորածների ծնողների հետ է հանդիպել ՊՆ նախարարի տեղակալ Արման Սարգսյանը, սակայն ծնողները պահանջել են հանդիպում Պապիկյանի հետ:
Նշենք, որ «Քիմիկների զորամասի» անհետ կորած զինծառայողների ծնողները պարբերաբար բողոքի ակցիաներ են անում՝ պահանջելով վերադարձնել իրենց զավակներին:
Հիշեցնենք, որ 44-օրյա պատերազմի ժամանակ «Քիմիկների» զորամասի զինծառայողներին հոկտեմբերի 21-ին տեղափոխել էին Արցախ՝ մարտական առաջադրանքի եւ սխալ հրամանի պատճառով նրանք հայտնվել էին շրջափակման մեջ: Այս ամենի հետեւանքով Աբգարյանի «Քիմիկների զորամասի» 40 զինծառայողներից 5-ը գերեվարվել են, 12-ը՝ սպանվել, իսկ մնացած 23 զինծառայողներն ու ավտոբուսի վարորդը անհայտ կորած են։ Դեպքի առնչությամբ մեղադրյալի կարգավիճակ ունեն մի քանի բարձրաստիճան զինվորականներ, որոնց թվում է՝ գեներալ Անդրանիկ Մակարյանը:
