Հայ-ռուսական հարաբերություններում հարցեր նախկինում էլ են եղել, նախկին իշխանությունների օրոք, բայց Հայաստանի ներկա իշխանությունները սկզբունքորեն ավելի հանրային են, շատ բան է արվում բաց ռեժիմով։ Այս մասին լրագրողների հետ զրույցում սեպտեմբերի 8-ին ասել է քաղաքագետ Ալեքսանդր Իսկանդարյանը։
Նա պարզաբանել է, որ մինչեւ 2018թ. խնդիրներ նույնպես եղել են, բայց դրանք լուծվել են ավելի բյուրոկրատորեն։
«Մյուս կողմից՝ ռուս-ուկրաինական պատերազմի ֆոնին Ռուսաստանը շատ նյարդային է ընկալում այն ամենը, ինչ տեղի է ունենում հետխորհրդային տարածքում։ Մեկը մյուսի վրա այս երկու դիսկուրսները դնելը հանգեցնում է բախումների ուղիղ եթերում, որոնք առաջ մենք չենք տեսել։ Բայց լուրջ քաղաքական մակարդակով ոչ մի լուրջ բան տեղի չի ունենում։ Հայաստանը դուրս չի եկել ՀԱՊԿ-ից, ԵԱՏՄ-ից, Երեւանը դուրս չի եկել ԱՊՀ-ից, երկկողմ համաձայնագրերը շարունակում են գործել»,- ընդգծել է Իսկանդարյանը։
Նրա խոսքով՝ այն, ինչ տեղի է ունենում այժմ, երկու մենախոսություն է. կողմերը միմյանց չեն լսում։
Փորձագետը կարծում է, որ Ռուսաստանը չի կատարում այն բոլոր պարտավորությունները, որոնք ստանձնել է 2020թ.։
«Լաչինի միջանցքը իրապես վերահսկում են ադրբեջանցիները, որոնք ստուգում են հենց ռուս խաղաղապահներին։ Իմ տեղեկություններով՝ Ադրբեջանը խաղաղապահներին ստուգում է անգամ ուղղաթիռներով թռչելիս»,- ավելացրել է նա։
