Կարո՞ղ էր արդյոք Թուրքիան աջակցել Բաքվին, միջոցներ եւ օգնություն տրամադրել 44-օրյա պատերազմի ժամանակ, եթե ԱՄՆ-ից թույլտվություն ստացած չլիներ։ Ոչ։ Այս մասին հայ-ռուսական մեդիա-ֆորումի ժամանակ սեպտեմբերի 8-ին ասել է ռուս քաղաքագետ Ֆյոդոր Վոյտոլովսկին։
«Կարո՞ղ էր արդյոք Թուրքիան իր գործողությունները համաձայնեցնել Բաքվի հետ՝ չտեղեկացնելով ՆԱՏՕ հրամանատարաշտաբային ղեկավարությանը։ Ինչո՞ւ ԱՄՆ-ն թույլ տվեց Թուրքիային եւ Բաքվին անել այն, ինչ նրանք արեցին։ Ո՞ւմ է պարտք Թուրքիան։ Ո՞վ է թուրքական բանկերի առաջատար դոնորը։ Ո՞վ է միջազգային տարբեր նախագծերի թուրքական պատվիրատուն, այդ թվում Իրաքում եւ Սիրիայում։
Ինչո՞ւ ԱՄՆ-ն արեց այն, ինչ տեղի է ունենում Արցախում հումանիտար իրավիճակի տեսակետից։ Որովհետեւ նա այդ կերպ ստանում է ազդեցության լծակներ իրավիճակի վրա։ Դա ուղղված է Ռուսաստանի եւ Հայաստանի թուլացմանը, քանի որ թույլ Հայաստանն ավելի հեշտ է կառավարել»,- ավելացրել է փորձագետը։
Նա նշել է, որ ԱՄՆ-ն հայտարարում է Լաչինի միջանցքի ապաշրջափակման անհրաժեշտության մասին, բայց շփումներ է պահպանում Ադրբեջանի հետ։
