Ֆրանսիայի ԱԳՆ ղեկավարի այցը Հայաստան առաջիկայում կարող է հանգեցնել Երեւանին ռազմական օգնություն ցուցաբերելու օրակարգի ձեւավորմանը։ Այս մասին NEWS.am -ի թղթակցի հետ զրույցում ասաց Մարսելի Աբովյանի անվան վարժարանի վարիչ, գրող Կարեն Խուրշուդյանը։
Նա հիշեցրեց, որ Փարիզն արդեն քաղաքական աջակցություն ցուցաբերել է՝ հայտարարելով, որ Սյունիքը Հայաստան է և այնտեղ գլխավոր հյուպատոսություն բացելու որոշում կայացնելով։
Նրա գնահատմամբ՝ սա «լուրջ ապտակ էր Ռուսաստանին, որը կորցրեց Հարավային Կովկասը»։
«Անհրաժեշտ է ռազմական աջակցություն ցուցաբերել և օգնել հայ ժողովրդին պաշտպանել Հայաստանի սահմանները հետագա հարձակումներից, ինչի հավանականությունը եվրոպական երկրները բարձր են գնահատում»,- ընդգծեց Խուրշուդյանը։
Միաժամանակ, նա նշեց, որ Ֆրանսիայից ռազմական օգնության տրամադրման հնարավոր խոչընդոտ կարող է լինել ոչ միայն Հայաստանի անդամակցությունը ՀԱՊԿ-ին, այլ նաև լոգիստիկ գործոնը, քանի որ միակ հնարավոր երթուղին կարող է անցնել Իրանի միջով, որը գտնվում է ամերիկյան խիստ պատժամիջոցների տակ։
«Ուստի, այս դեպքում պետք է ընդհանուր լեզու գտնել ԱՄՆ-ի հետ, որպեսզի նրանք գոնե մեղմեն պատժամիջոցները, և հնարավոր դառնա Իրանի տարածքով ռազմական օգնություն ցուցաբերել Հայաստանին։ Դա կարելի է անել նաեւ ՄԱԿ-ի Անվտանգության խորհրդի բանաձեւի միջոցով, որտեղ Ռուսաստանն, որն ունի վետոյի իրավունք, անկասկած, կօգտվի դրանից։ Զինվորականների գործուղումը, որի մասին խոսում են ֆրանսիացի խորհրդարանականները, նույնպես փոխկապակցված է զենքի մատակարարման հետ, քանի որ առանց զենքի անձնակազմի ներկայությունը ոչնչի չի տա։
Բացի այդ, պետք է հասկանալ, որ Իրանն էլ ունի իր շահերը, և Թեհրանը կցանկանա իր մասնաբաժինն օգնության չափից, որը տեսականորեն կարող է տրամադրվել Հայաստանին։ Սա հարց է առաջացնում, թե ինչ գին պետք է վճարի Արևմուտքը»,- հավելեց գրողը։
Ընդ որում, նա չի կարծում, որ Ֆրանսիան հայ ժողովրդին աջակցելու հարցում կոնկրետ նյութական օգուտներ ստանալու կոնկրետ ակնկալիքներ ունի։ Հայաստանը լուրջ բնական ռեսուրսներ չունի, սակայն Հայաստանի իշխանությունները կարող էին մտածել առաջիկա 10-20 տարիների համար Ֆրանսիային ձեռնտու խոշոր նախագծերի մասին՝ Փարիզի մոտիվացիայի մակարդակը բարձրացնելու համար։
«Օրինակ՝ կարելի էր քննարկել ատոմակայանների վերակառուցման կամ կառուցման, քաղաքացիական ինքնաթիռների գնման ոլորտներում ծրագրեր և շատ այլ բաներ: Հայաստանը պետք է արտաքին հարաբերություններն ընդլայնելու հնարավորություններ ստեղծի, որպեսզի թուլացնի Ռուսաստանի մենաշնորհային ազդեցությունը Հայաստանի տնտեսության վրա և որևէ խնդիր առաջանալու դեպքում կոտրված տաշտակի առաջ չկանգնի։
Բայց դա չի նշանակում, որ մենք պետք է կտրվենք Ռուսաստանի հետ պատմական կապերից։ Պարզապես, պետք է աշխատել հայ ժողովրդի անվտանգությունն ապահովելու բոլոր տեսակի մեխանիզմների ստեղծման վրա»,- պարզաբանեց Խուրշուդյանը։
Նա Հայաստանի կողմից արտաքին քաղաքական վեկտորի փոփոխություն չի տեսնում՝ հղում անելով նրան, որ Երեւանը դուրս չի եկել ՀԱՊԿ-ից, ԵԱՏՄ-ից կամ ԱՊՀ-ից։
«Երևանի ներկայությունն այս ասոցիացիաներում չի նշանակում, որ Հայաստանը չպետք է սերտ հարաբերություններ կառուցի այլ երկրների հետ»,- եզրափակեց գրողը։
Արամ Դանիելյան
