Մենք թույլ ենք տալիս, որ ՀԱՊԿ շրջանակներում մեր թիկունքում որոշումներ կայացվեն, դա Անկարան և Բաքուն ակտիվորեն կօգտագործեն։ Այս մասին NEWS.am -ի թղթակցի հետ զրույցում ասաց քաղաքագետ Արթուր Խաչիկյանը։
«Հայաստանը ՀԱՊԿ-ից դուրս չի գալիս, սակայն ամեն ինչ արվում է կազմակերպությունը վարկաբեկելու համար։ Ոչ ոք արևմտյան գործընկերներին չի հարցնում, թե ինչ են առաջարկում մեզ դրա դիմաց։
Պատրա՞ստ են նրանք ապահովելու մեր անվտանգությունը։ Պատրա՞ստ են այստեղ իրենց զորքերը տեղակայել։ Ինչպե՞ս է դա արվելու։ Ֆրանսիայի պաշտպանության նախարարն ուղղակիորեն հայտարարել է, որ իր երկիրը պատրաստ չէ միջամտել Հայաստանի դեմ ագրեսիայի դեպքում։ Ոչ ոք պատժամիջոցներ չի կիրառում։ Ինչպես 100 տարի առաջ, Արևմուտքը գեղեցիկ խոսքերով փորձում է մեզ պոկել Ռուսաստանից, բայց դրա դիմաց ոչինչ չի առաջարկում»,- նշեց նա։
Նրա խոսքով՝ ԱՄՆ-ը հռետորաբանության մակարդակով ցուցադրաբար դեմ է Ադրբեջանին, սակայն հեռախոսազանգերով հարցերը չեն լուծվում, անհրաժեշտ են կոնկրետ երաշխիքներ։
«Մենք անընդհատ խոսակցություններ ենք լսում, որ կա՛մ մեզ կփրկի Արևմուտքը, կա՛մ Ռուսաստանը: Այս ամենը հանգեցրեց ողբերգության»,- հավելեց փորձագետը: