Մեքսիկայի Տաքսկո քաղաքում (Տաքսկո, Գերերո նահանգ) որոնումներ են սկսվել անհետացած լրագրող Մարկո Անտոնիո Տոլեդո Խամեսի և նրա ընտանիքի համար, միևնույն ժամանակ հայտնի է դարձել, որ այս քաղաքում անհետ կորել է ևս երկու լրագրող՝ ամուսիններ Սիլվիա Արսենը եւ Ալբերտո Սանչեսը, հայտնում է Մեքսիկայի դատախազությունը։
«Պետական գլխավոր դատախազությունը խնդրում է ձեր օգնությունը Մարկո Անտոնիո Տոլեդո Խամեսի որոնման համար», - ասվում է Գերերոյի դատախազության բլոգում X սոցիալական մեդիայի կայքում:
Իրավապահ մարմինների տվյալներով՝ 59-ամյա Տոլեդո Խամեսին, ինչպես նաև կնոջն ու որդուն վերջին անգամ տեսել են նոյեմբերի 19-ին Տաքսկոյում, իսկ նոյեմբերի 22-ին գերատեսչությունը հայտնել է նրանց անհետացման մասին։ Տղամարդը գլխավորում է El Espectador de Taxco շաբաթաթերթը, ինչպես նաև համագործակցում է այլ լրատվամիջոցների հետ: Հայտնի է, որ նա անդրադարձել է տարածաշրջանային սոցիալական խնդիրներին։
Դատախազության զեկույցի հետ միաժամանակ մեքսիկաբնակ ամերիկացի գրող Ջուլիսա Արսե Ռայան իր բլոգում հայտարարել է, որ առևանգել են իր քրոջը՝ Սիլվիա Արսենին և նրա ամուսնուն՝ Ալբերտո Սանչեսին։ Զույգը ղեկավարում է Red Siete տարածաշրջանային լրատվական կայքը: Կնոջ խոսքով՝ մի խումբ անհայտ զինված մարդիկ նրանց առևանգել են նոյեմբերի 23-ին Տաքսկոյում՝ փողոցում թողնելով զույգի երեք, հինգ և 13 տարեկան երեք երեխաներին:
