Իշխանության հայտարարությունները, թե անվտանգության ոլորտում դիվերսիֆիկացիա են անում, զենքեր են գնում այլ աղբյուրներից, դրանք ընդամենը ձեւակերպումներ են արդարացնելու իրենց գործողությունները, որովհետեւ իրենց իշխանության գալուց առաջ էլ Հայաստանը համագործակցել է ՆԱՏՕ-ի հետ: Այս մասին NEWS.am-ի հետ զրույցում ասաց ՀՀ արտակարգ եւ լիազոր դեսպան Ձյունիկ Աղաջանյանը:
«Հայաստանի զինված ուժերի որոշակի մաս նաեւ վերապատրաստումներ է անցել ՆԱՏՕ-ի տարբեր երկրներում: Հայաստանը շատ ակտիվ համագործակցել է ՆԱՏՕ-ի մի քանի երկրների հետ իրենց խաղաղապահ առաքելությունների շրջանակներում, ըստ անհրաժեշտության եւ ըստ կարիքների սպառազինության կամ զինատեսակների կամ զորքի հագեցածության տարբեր պարագաների ձեռքբերում իրականացվել է ոչ միայ ՀԱՊԿ-ի դաշտից, հիմնականում ՌԴ-ից, այլեւ այլ պետություններից եւ այստեղ երբեւէ խնդիրներ չեն առաջացել:
Այս խնդիրները փորձում են ներկայացնել սուր լույսի ներքո, որպեսզի արդարացվի դեպի ՆԱՏՕ կամ ինչպես ԱՄՆ Ներկայացուցիչների պալատի լսումների ժամանակ ներկայացվեց, տրանսատլանտյան համագործակցությանն ուղղված իրենց քայլերն արդարացնելու համար»,-ասաց նա:
