Վրաստանի վարչապետ Իրակլի Ղարիբաշվիլին հանդիպել է Հայաստանի Հանրապետության վարչապետի աշխատակազմի ղեկավար Արայիկ Հարությունյանի հետ, տեղեկացրել է վրացական Առաջին ալիքը։

Զրույցի ընթացքում քննարկվել են  երկկողմ համագործակցության հարցեր։ Նշվել է, որ բարձր մակարդակով երկխոսությունը ռազմավարական հարցերի շուրջ օգուտ կբերի ոչ միայն Վրաստանին եւ Հայաստանին, այլեւ ամբողջ տարածաշրջանին։

Խոսելով տարածաշրջանում խաղաղության եւ կայունության աջակցության անհրաժեշտության մասին՝ վարչապետն ընդգծել է, որ Վրաստանը բաց է ցանկացած կառուցողական գործընթացին աջակցելու համար, որն ուղղված կլինի տարածաշրջանում խաղաղության եւ կայունության ամրապնդմանը։

Հանդիպման ժամանակ, որը կայացել է կառավարության աշխատակազմում, ուշադրությունը սեւեռվել է երկու երկրների միջեւ բարիդրացիական եւ բարեկամական հարաբերությունների վրա։